Елордалықтар әскерден оралған жас жауынгерлерді қарсы алды

Елорданың Қорғаныс істері жөніндегі департаменті жас жауынгерлерді салтанатты түрде қарсы алу іс-шарасын ұйымдастырды, деп хабарлады Elorda.info Қорғаныс министрлігіне сілтеме жасап.

Пойыздың Алматыдан Астанаға келуінің өзі де ерекше болды. Перронда Қарулы күштер мен Ауған соғысы ардагерлері, «Жас сарбаз» республикалық әскери-патриоттық қозғалысының тәрбиеленушілері, сарбаздардың ата-аналары, туыстары мен достары жиналды.

Осыдан тура бір жыл бұрын елорданың осы теміржол вокзалынан 35-ші гвардиялық десанттық-шабуылдау құрамасында қызмет етуге қырық сарбаз жібердік. Қарулы күштердің осындай мықты бөлімшесінде шымыр және жан-жақты жақсы дайындалған жастарды жинаймыз. Бұл – олардың келешегіне жақсы жолдама. Армия мектебінен өткен адамның жұмысқа орналасуда да өзіндік артықшылығы барлығына нық сенімдімін, - деп атап өтті Астана қаласы Қорғаныс істері жөніндегі департаменті бастығының орынбасары, майор Артур Қасқарауов.

«Қарулы Күштердің ардагерлері» РҚБ төрағасының орынбасары, генерал-майор Марат Нағұманов осындай ұлдар тәрбиелеген сарбаздардың ата-аналарына ерекше алғысын білдірді.

Біз Отан алдындағы борышын өтеген жігіттерді қарсы алдық. Әскерден қашатындардай емес, олар – өскелеңге ұрпаққа үлгі. Әлемдегі жағдай, қаңтар оқиғасы жастарды елді, жерді сүюге тәрбиелеу қажеттігін көрсетіп жатыр. Бізге нағыз патриоттар керек, онсыз Мәңгілік ел ұлттық идеясын жүзеге асыру мүмкін емес, - деді ардагер.

Запасқа шығарылған әскери қызметшілерді әскери оркестрдің әуенімен сүйемелдеп қарсы алған теміржол бойы нағыз мерекелік алаңға айналды.

Мен десанттық-шабуылдау батальонында граната атқыш маманы болып қызмет еттім. Бастапқыда ауыр болғаны рас, кейінірек бәріне үйрендім. Қызмет барысында парашютпен жеті рет секірдім, - деді гвардия қатардағы жауынгері Бекзат Орынбасар.

Туыстары мен жақындары оның шымырланған сымбаты мен сенімінің артқанына таң қалды. Әрине, бұл – командирлердің, сержанттардың, нұсқаушылардың және сарбаздардың жұмыстарының нәтижесі.

Әскерден келген сарбаз Әлішер Тастыбайдың әжесі шынайы қуанышымен бөлісті.

Менің немерем Қонаев гарнизонындағы десанттық-шабуылдау бригадасында қызмет етті. Ол көп нәрсені үйреніп, парашютпен де секіруді меңгерді. Бөлім командиріне бізбен байланыс орнатқаны, жаңалықтарын айтуға мүмкіндік бергені үшін көп рахмет, - деді Күлпан Шайсұлтанова.

Теміржол бойындағы осынау оқиғаға куә болғандардың бәрі қуанды. Түр-тұлғасын ерекшелеп тұратын көгілдір берет киген десантшыларға балалар қызыға қарады.