Елордалық тұрғындарға пәтер кілті табысталды

Кезекте тұрғандардың арасында жетім балалар, толық емес отбасылар, ерекше қажеттіліктері бар балаларды тәрбиелеп отырған отбасылар, көп балалы отбасылар, 1 және 2 топтағы мүгедектер, зейнеткерлер бар. «Нұрлы жер» мемлекеттік тұрғын үй құрылыс бағдарламасы аясында пәтер кілттерін Нұр-Сұлтан қаласының әкімінің орынбасары Нұрлан Нұркенов салтанатты түрде табыстады.

Пәтерлердің бір бөлігі жұмыс істейтін жастарға арналған бағдарлама бойынша берілді.

 Мемлекет басшысының тапсырмасы бойынша елордада қолжетімді әлеуметтік тұрғын үй құрылысының көлемі ұлғайды. Мысалы, 2018 жылы - 1100 пәтер, 2019 жылы - 2900 пәтер, 2020 жылы - 7000 пәтер, 2021 жылы - шамамен 10 000 пәтер салынды. Ол үшін барлық құрылыс индустриясы тартылған. Қоныстарыңыз құтты болсын. Үйлеріңіз қуанышқа, шаттыққа тосын, - деді Нұр-Сұлтан қаласының әкімінің орынбасары Нұрлан Нұркенов  өз құттықтау сөзінде.

Тұрғын үй кешені Ұлы Дала даңғылында, Нұра-Есіл арнасының артында орналасқан және Jetisu бигвилліне кіреді. Ауданда тұрғын үй кварталдарынан басқа мектеп, дамыту орталығы, сауда үйі және т.б. нысандардың құрылысы жоспарланған.

Баспаналы болған тұрғындардың бірі – Әлия Саменова. «Алтын алқа» иегері бұл пәтерді алу үшін 15 жыл кезекте тұрған.

Үй кезегінде тұрып, көптен күткен пәтеріме қол жеткіздім. Осындай мүмкіндік жасап, елеп-ескеріп жатқан қала әкімшілігіне алғысымды білдіремін. Біз үшін баспана басты мәселе ғой. Өте ризамын, - деп қуанышымен бөлісті «Алтын алқа» иегері Әлия Саменова.