Елордада «Менің туым!» атты патриоттық акция өтті

ашық дереккөз

Аталған шара Қазақстан Республикасының Мемлекеттік Туын насихаттау, елорда тұрғындарының бойында патриоттық сезім қалыптастыру мақсатында ұйымдастырылды. Акция барысында Жастар саясаты мәселелері басқармасы «Астана жастары» Жастар ресурстық орталығының еріктілері Нұрсұлтан Назарбаев халықаралық әуежайында, вокзалдарда және басқа да орындарда орналасқан жолаушыларды тасымалдайтын көлік жүргізушілеріне 3000 дана мемлекеттік жалауша таратты.

- Шара Тәуелсіздіктің торқалы тойы аясында «Тіл және рәміз» деген ұранмен өтіп жатыр. Дайындаған жалаушаларды ең бірінші такси жүргізушілеріне үлестіреміз. Өйткені қалаға алғаш аяқ басқан қонақты күтіп алатын да, тұрғындардың жиі мінетіні де осы көліктер. Ал қоғамдық көліктен артылған жалаушаларды көшедегі халыққа таратамыз. Келер жылы мемлекеттік рәміздерімізге 30 жыл толады. Сондықтан бұл акция әлі де кең ауқымда жалғасын табады. Түріктер қызыл байрақтарын үйлеріне де, балкондарына да іліп қояды. Бізде шын патриот екенімізді осылай көрсетуіміз керек. Биыл Президентіміз мемлекеттік рәміздерді қолдану аясын кеңейту жайлы арнайы заң қабылдаған еді. Сондықтан көк байрағымызды көбірек көрсетуіміз керек - деді Тілдерді дамыту және архив ісі басқармасының басшысы Сәкен Есіркеп.

Игі шара орталық саябақтан бастау алды. Еріктілер 30-ға жуық «Region» таксилеріне көк жалаушаларды зор сеніммен табыстады.

- Акцияға қатысуға қуана келістік. Өйткені мемлекеттік ту – еліміздің тарихы және оның бүгінгі күні, халқымыздың бірлігі мен Тәуелсіздігінің нышаны. Сондықтан кез келген қазақстандық мемлекеттік туымызды құрметтеп, төрінен орын беруі тиіс. Компания жүргізушілері аталған шараға шын ниеттерімен қатысуда - деді «Region» такси компаниясының директоры Самат Қалымбетов.