«Таза Қазақстан» акциясы: Астанада 43 мыңнан астам құқық бұзушылық анықталды

Астана қаласында «Таза Қазақстан» экологиялық акциясы жалғасып жатыр, деп хабарлады Elordainfo.kz.  

Акция басталғаннан бері полиция қызметкерлері мен уәкілетті мемлекеттік органдардың бірлескен рейдтік іс-шаралары нәтижесінде 43 мыңнан астам әкімшілік құқық бұзушылық фактісі анықталды.

Атап айтқанда, Шарбақты көшесінің бойында Howo жүк көлігі жүргізушісінің құрылыс қалдықтарын белгіленбеген орынға төккені анықталды. Тиісті тексеріс нәтижесінде құқық бұзушыға қатысты ҚР ӘҚБтК-нің 505-бабы бойынша әкімшілік хаттама толтырылып, көлік құралын пайдалануға уақытша тыйым салынды. Науқан басталғаннан бері рұқсат етілмеген жерлерге қоқыс шығарғаны және ағынды суларды төккені үшін 500-ден астам жүк көлігі мен кәріз тасушы көлік жүргізушілеріне қатысты айыппұл салынды.

Полиция қала тұрғындары мен ұйымдарды қала аумағын абаттандыру қағидаларын қатаң сақтауға және тұрмыстық, құрылыс қалдықтарын арнайы рұқсат етілген орындарға ғана шығаруға шақырады.