Іздеу 
Риддер тұрғыны сирек кездесетін қару тауып алып, полицияға өткізді
Ернұр Қайнар
Риддер тұрғыны XIX ғасырға тиесілі сирек қаруды тауып, полицияға өткізді, деп хабарлайды Elordainfo.kz Polisia.kz сайтына сілтеме жасап.
Громотуха өзенінің маңындағы жай ғана серуен 43 жастағы Риддер тұрғыны үшін күтпеген олжамен аяқталды. Ер адам жай ғана темір емес, ғасырлық тарихы бар раритетті атыс қаруын тауып алды.
Қарудың кез келген түрін тіркеусіз сақтау заң бұзушылық екенін түсінген қала тұрғыны табылған затты өзінде қалдырмады. Ер адам дереу Риддер қалалық полиция бөліміне хабарласып, заңсыз сақталған қаруды ерікті түрде тапсыру бойынша республикалық акция аясында затты полиция қызметкерлеріне табыс етті.
ШҚО полиция департаменті жедел-криминалистикалық басқармасының мамандары жүргізген зерттеу нәтижесінде, полиция қолына нағыз «ардагер» – 8 мм калибрлі Лефоше жүйесіндегі револьвер түскені анықталды.
«Лефоше жүйесіндегі револьверлер – XIX ғасырдың соңындағы аңызға айналған қару. Штаттық оқ-дәрілердің болмауына байланысты оның атысқа жарамдылығын анықтау мүмкін болмағанымен, сарапшылар заттың зауыттық шығу тегін және тарихи құндылығын растады. Бұл — табылған «өткен шақтың сынығы» құқық қорғау органдарына дер кезінде өткізілген сирек кездесетін жағдай», - деп атап өтті криминалистер.
Қазіргі уақытта бұл құнды жәдігер есепке алынды.
Полиция еске салады: заңсыз сақталған қаруды өз еркімен тапсыру азаматтарды қылмыстық және әкімшілік жауапкершіліктен босатады. Бұл – заңды бұзбай, өзіңізді және айналаңыздағыларды қауіп-қатерден қорғаудың ең сенімді жолы.
Еске сала кетейік, елімізде қылмыс деңгейі 10%-ға азайды.
