Іздеу Halyk Bank «Таза Қазақстан» бастамасын қолдады
Ернұр Сағымбек
Бүгін Halyk Bank қызметкерлері «Таза Қазақстан» жалпыұлттық экологиялық акциясы аясында Астанадағы Президенттік саябақ аумағында ауқымды сенбілік жұмыстарын өткізді, деп хабарлайды Elordainfo.kz.
Ұйымдастырушылар «Таза Қазақстан» акциясының маңызына тоқталып, бұл бастаманың тек бір реттік іс-шара емес, ұзақмерзімді экологиялық мәдениетті қалыптастыруға бағытталғанын атап өтті. Олардың пікірінше, табиғатты қорғау – әр азаматтың ортақ міндеті, ал мұндай акциялар сол жауапкершілікті сезінуге жол ашады. Әсіресе, ірі ұйымдардың бастаманы қолдауы қоғамға оң үлгі көрсетеді.
«Өткен аптадан бері елордада тазалық жұмыстары қарқын алып, ауқымы күн санап кеңейіп келеді. Президенттік саябақтағы сенбілікке 350-ден астам адам жұмылдырылып отыр. Бұл «Таза Қазақстан» жалпыұлттық акциясын қолдауға бағытталған нақты қадамдардың бірі. Басты мақсат – Астана қаласының тазалығын сақтау ғана емес, тұрғындар үшін жайлы әрі көрікті орта қалыптастыру. Бүгінгі тазалық жұмыстары Сығанақ көшесінен Тәуелсіздік даңғылына дейінгі аралықты қамтиды», – деді Астана қаласының Инвестициялар және кәсіпкерлікті дамыту басқармасының бас маманы Райымбек Нысанбаев.
Айта кетейік, елімізде экологиялық мәселелерге деген қоғамдық назар айтарлықтай артып келеді. «Таза Қазақстан» акциясы осы бағыттағы ең ауқымды бастамалардың бірі ретінде түрлі өңірлерде жүйелі түрде ұйымдастырылып жүр. Оған мемлекеттік мекемелермен қатар, жеке сектор өкілдері мен еріктілер де белсенді қатысуда.
«Біз үшін туған қаланың тазалығы – ортақ жауапкершілік. Сондықтан әрбір тұрғын бұл іске бейжай қарамауы тиіс. Тазалық тек айналамыздан ғана емес, ниетіміз бен ойымыздан да басталады. Осындай сенбіліктер – қоғамдағы бірлік пен жанашырлықтың айқын көрінісі. Өткен сенбілікте де, бүгінгі шарада да қала тазалығын сақтауға баршамыз бір кісідей жұмылып отырмыз. Бұл – қоршаған ортаға деген құрметіміздің және келер ұрпақ алдындағы жауапкершілігіміздің нақты дәлелі», – деді Астана қалалық Halyk Bank филиалының директоры Жанар Рахимова.
Бүгінгі Halyk Bank ұжымы өткізген сенбілік қоғамда тазалық мәдениетін қалыптастырып, қала тұрғындарына таза әрі жайлы орта қалдыруға негіз болатыны сөзсіз.
