Мемлекет басшысының медицина қызметкерлерінің мәртебесін көтеру және оларды әлеуметтік қолдауды күшейту жөніндегі тапсырмасын орындау шеңберінде соңғы жеті жылда Қазақстанда дәрігерлердің орташа жалақысы 2,8 есе өсті. Бұл туралы Үкімет отырысы барысында денсаулық сақтау министрі Ақмарал Әлназарова баяндады, деп хабарлады Elordainfo.kz.

Атап айтқанда, ол медициналық сақтандыру жүйесіне көшу қаржыландыруды едәуір арттыруға мүмкіндік бергенін атап өтті. Денсаулық сақтау шығындары екі еседен астам жылдам өсе бастады – жылына орта есеппен 23,8%. Осының нәтижесінде медицинаға жеке инвестициялар тартылды, дәрігерлердің өздері үшін еңбек жағдайлары жақсарды.

«Соңғы 7 жылда дәрігерлердің орташа жалақысы 159 мың теңгеден 442 мың теңгеге дейін өсті. 1 адамға арналған медициналық шығыстар 98 мың теңгеден 258 мың теңгеге дейін ұлғайды. Қаржыландырудың ұлғаюы медициналық көмектің қолжетімділігіне тікелей әсер етті. Бастапқы деңгейде көрсетілетін қызметтер және консультациялық-диагностикалық қызметтер саны 2,7 есе ұлғайды», - деді Ақмарал Әлназарова.