Астанада полиция білім нысандардағы жағдайды 9,3 мың камерамен бақылайды

Астанада полиция қалалық білім басқармасымен бірлесіп білім беру нысандарының бейнебақылау жүйелерін полицияның жедел басқару орталығына қосып жатыр, деп хабарлайды Elordainfo.kz ІІМ баспасөз қызметіне сілтеме жасап.

Бүгінгі таңда орталыққа 230-дан астам қалалық білім беру мекемесінің бейнекамералары мен дабыл батырмалары қосылған.

Жалпы қалада балабақшалар, мектептер, колледждер мен жоғары оқу орындарында орнатылған 9 300-ден астам камера тұрақты бақылауда. Осы жоба бойынша былтыр 170-тен астам қоғамдық тәртіп пен қауіпсіздік талаптарының бұзылуы анықталды. Биыл 25 осындай дерек тіркелді.

«Оқу орындарына іргелес аумақтардың қауіпсіздігіне ерекше назар аударылады. Мектептер мен балабақшалар маңындағы көше-жол желісіне тексеру жүргізіліп, жаяу жүргіншілер өткелдерінің, жол белгілерінің және жарықтандыру жүйесінің жағдайы қаралады. Оқушылардың мектеп – үй бағытындағы қозғалыс маршруттары талданып, қауіпті учаскелер анықталып, оларды қауіпсіздік талаптарына сәйкестендіру шаралары қабылданады», делінген хабарламада.

Кәмелетке толмағандар арасындағы құқық бұзушылықтардың алдын алу, буллинг пен бопсалауға қарсы іс-қимыл, оқу орындары маңындағы ықтимал қауіпті жағдайларды анықтау және мектеп әкімшіліктері мен әлеуметтік қызметтермен өзара іс-қимыл тұрақты негізде жүргізіледі.

Еске салсақ, Астанада жылы аялдамалардағы камералар Жедел басқару орталығына қосылғанын хабарладық.