Іздеу Астанада АИТВ-ға тегін әрі құпия тексерілуге болады
Думан Аманжол
Елорда тұрғындары АИТВ-ға қарсы тегін тексеріле алады, деп хабарлайды Elordainfo.kz Астана қаласы әкімдігінің «АИТВ инфекциясының алдын алу орталығының» баспасөз қызметіне сілтеме жасап.
Ақпаратқа сәйкес, АИТВ-ға тест тапсыру — инфекцияны дер кезінде анықтаудың негізгі тәсілдерінің бірі. Тексеру құпиялылық талаптарын сақтай отырып жүргізіледі. Қажет болған жағдайда азаматтарға АИТВ-ның алдын алу, диагностикалау және одан әрі медициналық бақылау мәселелері бойынша мамандар кеңес береді.
«АИТВ инфекциясы ұзақ уақыт бойы ешқандай айқын белгісіз өтуі мүмкін. Сондықтан ауру белгілерінің болмауы адамда инфекция жоқ дегенді білдірмейді. АИТВ мәртебесін нақты анықтаудың сенімді жолы — арнайы зертханалық тексеруден өту», - делінген хабарламада.
Биылғы жылдың алғашқы 8 айында Астанада жаңадан анықталған АИТВ жағдайларының жартысынан астамы инфекцияның кеш сатысында тіркелген. Бұған азаматтардың медициналық көмекке кеш жүгінуі және қауіп факторлары болған жағдайда да тұрақты түрде тест тапсырмауы себеп болып отыр. Уақтылы тексерілу өз АИТВ мәртебесін білуге, ал инфекция анықталған жағдайда медициналық көмек алып, емдеуді ерте кезеңде бастауға мүмкіндік береді.
Астана қаласының АИТВ инфекциясының алдын алу орталығында тексеру тегін жүргізіледі. Өзінің АИТВ мәртебесін білгісі келген кез келген азамат тест тапсыра алады. Сондай-ақ белгіленген тәртіпке сәйкес анонимді түрде тексерілу мүмкіндігі қарастырылған.
Орталық мамандары тестілеуге дейін және одан кейін кеңес беріп, АИТВ-ның жұғу жолдары мен одан сақтану тәсілдерін түсіндіреді. Қажет болған жағдайда қайта тексерілуге қолайлы мерзімді де белгілейді.
АИТВ жұқтыру қаупі болуы мүмкін жағдайларда тест тапсыруға ерекше мән берген жөн. Олардың қатарына қорғанышсыз жыныстық қатынас, ортақ инъекциялық құралдарды пайдалану немесе АИТВ жұқтырған адамның қанымен байланыс жатады.
Егер ықтимал қауіп төндірген жағдай жақында болған болса, Орталық мамандарына мүмкіндігінше ертерек жүгініп, кеңес алу ұсынылады. Жағдайдың мән-жайы бағаланғаннан кейін кейбір жағдайда қатынастан кейінгі профилактика жүргізу мәселесі қарастырылуы мүмкін.
АИТВ инфекциясын ерте анықтау қажетті медициналық бақылауды дер кезінде ұйымдастыруға және көрсетілім болған жағдайда емдеуді уақыт жоғалтпай бастауға мүмкіндік береді. Қазіргі заманғы антиретровирустық терапия АИТВ инфекциясын тиімді бақылауда ұстауға және АИТВ-мен өмір сүретін адамдардың өмір сапасын сақтауға көмектеседі.
АИТВ-ға тегін тестілеу Орталықта жүргізіледі.
Мекенжайы: Астана қаласы, І. Есенберлин көшесі, 5/1. Ресми сайты: kazaids.kz.
Еске салсақ, Денсаулық сақтау министрлігі алғаш рет 23 бөлек мемлекеттік ақпараттық жүйені 7 цифрлық экожүйеге біріктірді.
