Астанада 2030 жылға дейін қанша апатты үй сүріледі

Фото: Василий Крась

Бұл туралы Астана қаласы Тұрғын үй және тұрғын үй инспекциясы басқармасының басшысы Әнуар Саипов «Вечерняя Астана» газетіне берген сұхбатында айтты, деп хабарлайды Elordainfo.kz.

«2023-2029 жылдары сүрілуге жататын 206 апатты үйдің тізімі жасалды. Бұл шамамен 5 мыңға жуық пәтерді қамтиды («Алматы» ауданы – 3 үй, «Байқоңыр» – 104, «Есіл» – 5, «Сарыарқа» – 82, «Сарайшық» – 12 үй). 2024-2025 жылдары жүргізілген тексерулер нәтижесінде тағы 27 үй апатты деп танылып, 2029-2030 жылдарға арналған жоспарға енгізілді. Жалпы, 2030 жылға дейін 174 үйдің тұрғындарын көшіру жоспарланып отыр. 2026 жылы – 25 үй, 675 пәтер; 2027 жылы – 29 үй, 745 пәтер; 2028 жылы – 32 үй, 765 пәтер; 2029 жылы – 74 үй, 1 154 пәтер; 2030 жылы – 14 үй, 843 пәтер), бұл – 4 мыңнан астам пәтер», – деді Әнуар Саипов.

Басқарма басшысының сөзінше, бұл жұмыстар бірнеше жылдан бері жүйелі түрде жүргізіліп келеді.

«2013 жылдан бастап Астанада 341 апатты үйдің тұрғындары көшірілді, нәтижесінде 6 мыңнан астам отбасы жаңа баспанамен қамтамасыз етілді. Соңғы кезеңдерге тоқталсақ, 2023-2025 жылдардың өзінде 59 үйдің тұрғындары көшіріліп, 1 742 пәтер берілді», – деді ол.

Бұған дейін Астанада жаңа қоғамдық кеңістік пайда болғанын жаздық.