Елімізде электр энергиясының тарифі өсуі мүмкін

Келесі жылдан бастап еліміздегі станцияларды күрделі жөндеуден өткізу үшін электр энергиясының тарифі өсуі мүмкін, деп хабарлады Elorda.info.

Бұл туралы Ашық НҚА порталында жарияланған Энергетика министрінің бұйрық-жобасында жазылған.

Құжатта 2024 жылы қуаттылықтың шекті тарифінің деңгейі айына 1 065 мың теңге болатыны жазылған.

2016 жылдан бастап 2022 жылға дейінгі кезеңдегі инфляция коэффициентін ескере отырып, 2024 жылы қуаттылықтың шекті тарифінің деңгейі айына 1 065 мың теңге (қазір 590 мың теңге), 2025 жылы 1 215 мың теңге/МВт болуы тиіс. Бұл саланың инвестициялық тартымдылығын қамтамасыз етуге және авариялық жөндеудің жиілеп кеткен жағдайларын ескере отырып, Қазақстанның электр станцияларын күрделі жөндеуге қосымша инвестициялар тартуға мүмкіндік береді, - делінген құжатта.

Бұйрық 22 қыркүйекке дейін көпшілік талқылауда болады.