Ауыл шаруашылығы министрлігі Алматыдағы 120 гектарлық инновациялық бақтың жұмысымен таныстырды

Ауыл шаруашылығы министрлігі Алматы облысының әкімдігімен бірлесіп, өңірдің жетекші агроөнеркәсіптік кәсіпорындарына бұқаралық ақпарат құралдары өкілдері үшін баспасөз турын ұйымдастырды. Негізгі назар — бақша шаруашылығы, жеміс-көкөніс өнімдерін сақтау және қайта өңдеу саласындағы табысты үлгілерге аударылды, деп хабарлады Elordainfo.kz. 

Басты нысандардың бірі — «APPLE BEE» ЖШС болды. Бұл заманауи кәсіпорын алмаларды өсіруге, элиталық көшеттер мен табиғи салқындатылған тікелей сығымдау шырындарын өндіруге маманданған.

Компания басшысы Олжас Сванбаевтың айтуынша, 2013 жылы құрылған кәсіпорынның жалпы аумағы 110 гектарды құрайды. Оның ішінде 78 гектарға еуропалық технологиялар бойынша өсірілетін суперинтенсивті алма бақтары отырғызылған. Жер телімдерінде 12 сорттағы 400 мыңнан астам алма ағашы және 2 сорт абрикос пен алхоры бар. Кәсіпорын гектарына 60–70 тонна өнім алуда, ал жылдық жалпы өнім көлемі 4000 тоннаға дейін жетеді.

2016 жылдан бастап компания өз қажеттілігі үшін көшеттер өсіре бастады. Ал 2023 жылы лицензияланған элиталық көшетхана мәртебесін алып, еліміздің барлық өңірлеріндегі бағбандарға көшет сату нарығына шықты. 

Бүгінде көшетхана 25 гектар аумақта орналасқан. Мұнда вегетативті (клондық) телітушілердің аналық алқаптары, қалемшелік бақ және жылына 300 мыңнан 1 миллионға дейін көшет өндіруге арналған заманауи инфрақұрылым бар.

Компания әлемдік жетекші селекционерлермен бірлесе жұмыс істей отырып, Қазақстанның климаттық жағдайына бейімделген, халықаралық стандарттарға сай сапалы көшеттер өндіреді. Барлық қызметкерлер шетелдегі көшетхана мектептерінде кәсіби даярлықтан өтіп, мол тәжірибе жинақтаған. Жылдар ішінде 500 мыңнан астам ағаш өсіріліп, отырғызылды.

Жеміс пен көшет өсірумен қатар, компания қантсыз, сусыз және консервантсыз табиғи салқындатылған алма шырынын жылына 140 мың литрге дейін өндіреді. Өнім ішкі нарықта да, экспортқа да өткізіледі.

Өнімді сақтау үшін реттелетін газды ортаға ие заманауи жеміс қоймасы қолданылады. Бұл жемістердің ұзақ уақыт бойы балғындығы мен сапасын сақтауға мүмкіндік береді.
Баспасөз туры аясында журналистерге қазірдің өзінде өнім жиналып жатқан интенсивті бақтар көрсетілді.

«APPLE BEE» — Қазақстанда нәтижеге, сапаға және тұрақты дамуға бағытталған жоғары технологиялы агрокәсіпорындардың айқын үлгісі. Мұнда ғылым, халықаралық тәжірибе және нақты бизнес-тәсілдер тоғысқанын көріп отырмыз. Мемлекет осындай жобаларды қолдауды жалғастырады, себебі олар азық-түлік қауіпсіздігін нығайтуға және отандық бақша шаруашылығының экспорттық әлеуетін қалыптастыруға ықпал етеді», — деді Ауыл шаруашылығы вице-министрі Азат Сұлтанов.