Ажырасқан әйел жасауын сот арқылы қайтарып алды

ашық дереккөз

Сот дерегінше, ерлі-зайыптылар былтырғы маусым айында некеге тұрған. Қалыңдықтың туыстары ғұрыпқа сай ұзатылған қыздың жасауын апарып берген. Бірақ жылға жетпей екі жас ажырасады.

Осыдан кейін келіншек түскен үйінен жасауын қайтарып беруді сұраған. Алайда өтініші орындалмапты. Ақыры әйел амалсыз сотқа жүгінген. Сот тараптарға медиация арқылы дауды бейбіт жолмен шешуге кеңес берген. Нәтижесінде күйеу жігіт жағы 14 сәуірге дейін қалыңдықтың артынан келген мүлікті қайтаруға, ал талапкерлер келісілген күні өздеріне тиесілі жүкті тиеп алып кетуге міндеттеліпті.

Осыған ұқсас іс жарты жыл бұрын Маңғыстау облысында да тіркелген болатын. Бірақ, ол кезде ер адам әйелімен ажырасқан соң қайын жұртына берген қалыңмалын қайтарып алмақ болған.