Инватакси қызметі әлеуметтік қызметтер порталы арқылы көрсетілуі мүмкін

Еңбек және халықты әлеуметтік қорғау министрлігі «Ашық НҚА» порталында бұйрық жобасын жариялады, деп хабарлады Elordainfo.kz.  

Қазіргі уақытта инватакси қызметі мемлекеттік әлеуметтік тапсырыс арқылы жүзеге асады. Ал жаңа бұйрық жобасына сәйкес, мүгедектігі бар адамдарды инватаксимен тасымалдау әлеуметтік қызметтер порталы арқылы қолжетімді болмақ.

Бұл олардың қызмет көрсетушіні өзі таңдауына және көлікті өзінің ерекше қажеттіліктерін ескере отырып шақыруына мүмкіндік береді. Сондай-ақ қызмет көрсету және есеп алу процестерінің ашықтығын қамтамасыз етеді.

Бұдан бөлек, қызмет көрсету мерзімдері мен көлікті күту уақытын қысқартуға әсер етпек.

Бұйрық жобасын қоғамдық талқылау 2025 жылдың 6 тамызына дейін жалғасады.