Астаналық Дастан Ордабай спорт шеберіне үміткер атанды

2023 жылдың маусым айында Францияның Виши қаласында өткен интеллектуалдық даму ерекшеліктері бар адамдарға арналған VI Дүниежүзілік VIRTUS ойындарына қатысқан елордалық спортшы Дастан Ордабай спорт шеберіне үміткерлікке өтті, деп хабарлады Elorda.info.

Айтулы бәсекеде велотректен төрт бірдей қашықтықта сынға түскен жерлесіміз ел қоржынына 4 күміс медаль салған болатын.

Жүлделі екінші орыннан көрінген Астана қаласының спортшысына күні кеше «велоспорттан спорт шеберіне үміткер» спорттық разряды берілді.  

Зияткерлік даму ерекшеліктері бар тұлғаларға арналған спорт федерациясының президенті Дина Батырғалиқызының айтуынша, Қазақстан бойынша интеллектуалдық мүмкіндіктері шектеулі мүгедектігі бар спортшыларға дәл осындай «спорт шеберіне үміткер» спорттық разряды алғаш берілуі.  

Бұл Дастанның тағы бір үлкен жеңісі мен жетістігі. Сондай-ақ, Қазақстандағы зияткерлік даму ерекшеліктері бар тұлғаларға арналған спортты дамытудағы тағы бір үлкен қадам. Қазақстан құрамасы, жалпы Астана қаласының спортшылары осы Дүниежүзілік ойындарына «Sport Qory» cпортты қолдау қорының, «Самұрық-Қазына» АҚ және қалалық Дене шынықтыру және спорт басқармасының қолдауының арқасында қатысып келдік, - дейді федерация президенті Дина Темірғалиева.

Айта кетейік, «Virtus Global Games 2023» интеллектуалды даму ерекшеліктері бар тұлғаларға арналған Дүниежүзілік ойындар төрт жылда бір рет өткізіледі. Қазіргі уақытта Virtus ұйымына 90 мемлекет кіреді.