Елордада көркем гимнастикадан халықаралық турнир басталды

Бүгін Астанада балалар арасында «Alem Cup – Northern Lights» атты көркем гимнастикадан халықаралық турнирдің ашылуы өтті, деп хабарлады Elorda.info.

Салтанатты ашылу рәсімі «Qazaqstan» спорт аренасында өтті. Турнир үш күнге созылады.

Оған Қазақстан, Қырғызстан, Өзбекстан, Жапония, Вьетнам, Ресей, БАӘ, Сауд Арабиясы және Оңтүстік Кореядан 700-ден астам адам қатысады.

Айта кетейік, турнирдің ең жас қатысушылары небәрі бес жаста.

Бүгінгі іс-шараның құрметті қонақтары арасында Астана қаласы Дене шынықтыру және спорт басқармасының басшысы Самат Жылқыбаев, Астана қаласы көркем гимнастика федерациясының президенті Сайранбек Әбілхайыр және т.б. болды.

Бұл – қалалық деңгейдегі жыл сайынғы маңызды турнирлердің бірі. Бірақ біз биыл бұл іс-шараны республикалық емес, халықаралық деңгейде өткізіп жатырмыз. Бұл спорттық мансабында алғашқы қадамдарын жасайтын кішкентай спортшылар үшін керемет мүмкіндік. Олар үшін бұл үлкен тәжірибе болады, - деді Сайранбек Әбілхайыр.