Елордалық пара жүзуші Сиязбек Далиевті жанкүйерлері әуежайда қарсы алды

Спортшы Португалияда өткен пара жүзуден әлем чемпионатына қатысып, жүлделі үшінші орынды иеленді.

Салтанатты күтіп алу іс-шарасына Нұр-Сұлтан қаласының Дене шынықтыру және спорт басқармасының басшысы Самат Жылқыбаев, елордалық мүмкіндігі шектеулі спортшыларға арналған жасөспірімдер спорт мектебінің басшысы және БАҚ өкілдері, сондай-ақ спортшының отбасы келді.

Елордалық спортшы Сиязбек Далиев ыстық ықыласпен және құттықтаулармен қарсы алған жанкүйерлеріне алғысын білдірді.

Өзімнің еліме, Қазақстаныма медаль алып келгеніме қуаныштымын. Бұл біздің ортақ жеңісіміз! Қолдауларыңыз бен жылы лебіздеріңізге көп рақмет, - деп өз әсерімен бөлісті Сиязбек.

Еске салсақ, 12-18 маусым аралығында Португалияда пара жүзуден әлем чемпионаты өтті. Жарысқа 60 елден 509 атлет сынға түсті.

Елордалық пара жүзуші 50 м қашықтықты баттерфляй әдісімен 36,32 секундта жүзіп өтіп, әлем чемпионатының қола жүлдегері атанды.