Цифрландыруға тиімсіз жұмсалған 46 млрд теңгеге кім жауап береді – депутат

Бүгін Мәжілістің жалпы отырысында депутаттар инновациялық қызмет саласын мемлекеттік қолдау жүйесін жетілдіру мәселелері бойынша түзетулерді талқылап жатыр, деп хабарлады Elordainfo.kz.

Депутат Еркін Әбіл Цифрлық даму, инновациялар және аэроғарыш өнеркәсібі министрі Жаслан Мәдиевке Жоғары аудиторлық палата жүргізген аудит нәтижесінде қандай шаралар қабылданғанын сұрады.

«Өткен айда Жоғары аудиторлық палата цифрландыру бағдарламаларының аудитін өткізді. Оның ішінде инновациялық технологиялар паркі де бар. Нәтижесінде автономды кластерлік қоры қызметінде қаржылық бұзушылықтар бар екені анықталды. Атап айтқанда, 46 млрд теңге тиімсіз жұмсалған. Ғылыми зерттеулерге бөлінген бюджет қаражаты мақсатсыз пайданылған. Анықталған бұзушылық үшін нақты кім жауап береді? Тергеу қалай жүргізіледі және оған кім жауап береді?»,- деді депутат.

Министр Жаслан Мәдиев келісімшарт бойынша барлық жұмыстар атқарылғанын атап өтті.

«Сіз айтып отырған 46,5 млрд теңгені екі бөлікке бөлгім келеді. 41 млрд теңге бұл бөлінген бір пайыз шеңберінде жүзеге асырылған жұмыстар, яғни 2015 - 2024 жылдар кезеңінде. Келісімшарт бойынша барлық жұмыстар атқарылды, бұл бір жерде жоғалып кеткен ақша емес. Ал 5 млрд теңге технологиялық орталықтар құру және стартап жобаларға бөлінді. Жоғары аудиторлық палатаның ұсынысы бар. Біз қазір ол бойынша жұмыс істеп жатырмыз. Кейбір кейс бойныша материалдар келесі процедуралық шешімдерді күту үшін тиісті құқық қорғау органдарына беріледі»,- деді министр.