Астанада балалар нейрохирургі Серік Кизатуллин өмірден өтті

Астана танымал балалар нейрохирургі Серік Кизатуллин өмірден озды, деп хабарлады Elordainfo.kz.  

Ол өмірін балаларды құтқаруға арнады. №2 көпбейінді қалалық балалар ауруханасының нейрохирургия бөлімінің меңгерушісі қызметін атқарды. Жоғары санатты нейрохирург, қоғамдық денсаулық сақтау бойынша бірінші санаттағы маман.

22 жылдық медицина тәжірибесінде ол мыңдаған пациентке көмектесіп, ми мен жұлынға ең күрделі операцияларды жасады. Израиль, Литва, Түркияның алдыңғы қатарлы клиникаларында тағылымдамадан өтіп, әлемнің жетекші мамандарымен ынтымақтастық орнатты. Қазақ нейрохирургтар қауымдастығының белсенді мүшесі болып, «Денсаулық сақтау үздігі» белгісімен марапатталған.

«Терең күйзеліспен біздің әріптесіміз, көрнекті дәрігер және асыл жан Серік Кизатуллиннің өмірден өткенін хабарлаймыз.

Серік Сейілханұлы тек білікті дәрігер ғана емес, сондай-ақ жүрегі кең, жанашыр, өз кәсібіне және отбасына адал адам еді. Ол өзінен кейін тек құтқарылған өмірлерді ғана емес, оны білетіндердің жүрегінде өшпес із қалдырды.

Марқұмның отбасы мен жақындарына қайғырып көңіл айтамыз. Жаны жәннатта болсын…», - деп жазылған №2 көпбейінді қалалық балалар ауруханасының хабарламасында.