Іздеу Қазақстан қонақүйлері тұңғыш рет MICHELIN Key белгісіне ие болды
Жібек Наурыз
MICHELIN Guide әлемдегі ең үздік қонақүйлердің халықаралық тізімін жариялады. Қазақстан бұл беделді гидтің географиясына алғаш рет еніп отыр: отандық қонақүйлер беделді жинаққа қосылып қана қоймай, MICHELIN Key арнайы белгісіне ие болды, деп хабарлайды Elordainfo.kz Kazakh Tourism-ге сілтеме жасап.
MICHELIN Key — қонақүй саласындағы кулинариялық «Мишлен жұлдызының» ресми баламасы. Тәуелсіз әрі анонимді инспекция қорытындысы бойынша еліміздегі 5 қонақүй One MICHELIN Key («Бір Мишлен кілті») белгісіне ие болды:
· The Veil Hotel (Астана қ.)
· The St. Regis Astana (Астана қ.)
· The Ritz-Carlton, Astana (Астана қ.)
· The Ritz-Carlton, Almaty (Алматы қ.)
· Tenir Eco Hotel (Алматы қ.)
Бұдан бөлек, MICHELIN Guide ұсыныстарының жалпы санатына Қазақстанның тағы 9 қонақүйі енді.
MICHELIN сарапшылары еліміздің жаһандық туризмдегі өсіп келе жатқан тартымдылығын ерекше атап өтті.
«Алғашқы «Мишлен кілті» — бұл үлкен қуаныш әрі саяхатшылар үшін қалыптасқан дәстүрлі бағыттардан тыс аймақтарға көз тастауға жасалған шақыру. Ботсванадағы сафариден бастап Қазақстан елордасындағы сәулет оазисіне дейін — осы бес елдің қонақүйлері сапарға шығуға мүлдем өзгеше себептер ұсынады және инспекторларымыз әдеттегі туристік карталардан тыс жерлерден не тапқанын көрсетеді», - дейді сарапшылар.
Қазақстандық қонақүйлердің бұл мәртебелі тізімге енуі — елдегі туристік инфрақұрылымды жүйелі дамытып, қызмет көрсету деңгейін арттырудың нәтижесі. Халықаралық деңгейдегі мұндай баға Қазақстанның жоғары сапалы туризм орталығы ретіндегі беделін арттырып, шетелдік туристер үшін тартымдылығын күшейте түседі.
