Қостанайда пайдаланылмаған 3 мың гектар жер мемлекетке қайтарылды

Қарасу ауданының прокуратурасы ауыл шаруашылығы мақсатындағы жерлерді пайдалану бөлігінде жер заңнамасының сақталуына талдау жүргізді. Тексеру нәтижелері бойынша ұзақ уақыт нысаналы мақсаты бойынша пайдаланылмаған жер учаскелері анықталды, деп хабарлайды Elordainfo.kz Қостанай облысы прокуратурасына сілтеме жасап. 

«Анықталған бұзушылықтарға байланысты прокуратура тиісті қадағалау шараларын қабылдады. Оларды қарау нәтижесінде жалпы ауданы 3 мың гектар, кадастрлық құны 68 млн теңгені құрайтын жер учаскелері мемлекет меншігіне қайтарылды», - делінген хабарламада. 

Мемлекетке қайтарылған жер учаскелері кейіннен адал кәсіпкерлер арасында конкурстық негізде бөлінетін болады. Бұл олардың белгіленген нысаналы мақсатына сәйкес тиімді пайдаланылуын қамтамасыз етуге мүмкіндік береді.

Прокуратураның жер қатынастары саласындағы заңдылықты қамтамасыз ету жөніндегі жұмысы жалғасуда және тұрақты бақылауда.

Еске салайық, бұған дейін Қызылорда облысында 1 571 гектар жер мемлекетке қайтарылғаны туралы жаздық.