Іздеу Елімізде жүкті әйелдерге 12 түрлі медициналық тексеру тегін жүргізіледі
Ернұр Қайнар
Қазақстанда әйелдерге медициналық көмектің тұтас кешені мемлекет есебінен көрсетіледі. Бұл қызметтер әйелдердің репродуктивтік денсаулығының барлық маңызды кезеңдерін – отбасын жоспарлаудан бастап босанғаннан кейінгі қалпына келуге дейінгі кезеңді қамтиды, деп хабарлайды Elordainfo.kz Денсаулық сақтау министрлігіне сілтеме жасап.
425 медициналық-санитариялық алғашқы көмек ұйымы мен 24 облыстық перинаталдық орталықтың базасында жеке тіркеу бөлімдері, емшара кабинеттері және отбасын жоспарлау орталықтары ұйымдастырылған әйелдер консультациялары ашылды.
1 миллионнан астам әйел әйел консультацияларының қызметтерін алды. Ал жүктіліктің 10 аптасына дейін есепке тұрған жүкті әйелдердің үлесі 18%-ға артып, 71%-ды құрады.
Ұрықтың туа біткен даму кемістіктерін ерте анықтау мақсатында барлық өңірлерде перинаталдық орталықтардың базасында «Бір күндік клиникалар» ұйымдастырылды. Мұнда жүкті әйелдер кепілдік берілген медициналық көмек шеңберінде 5 түрлі зерттеуден өтіп, нәтижесін келесі күні алады.
Оқи отырыңыз: Тұмаудан қалай сақтану керек – маман кеңесі
«2026 жылы диагностикалық зерттеулермен 100 мыңнан астам жүкті әйел қамтылып, 500 мыңнан астам қызмет көрсетілді. Нәтижесінде ұрық кемістіктерін анықтау көрсеткіші 13%-ға артса, нәресте өлімінің көрсеткіші 15%-ға төмендеді.
2025 жылдан бастап Қазақстанда әйелдерді салауатты жүктілікке дайындауға бағытталған бірегей «Аналар саулығы» бағдарламасы іске асырылуда. Бағдарламаның шеңберінде 12 түрлі тегін медициналық тексеруден өтуге мүмкіндік қарастырылған», - делінген хабарламада.
Жыл сайын республикада 300 мыңнан астам босану қабылданады. Мемлекет ана мен бала денсаулығын сақтауға, әрбір әйелге тұрғылықты жеріне немесе қаржылық мүмкіндігіне қарамастан медициналық көмектің қолжетімділігін қамтамасыз етуге барлық жағдайды жүйелі түрде жасап келеді.
