Астана жаһандық қаржы орталықтары рейтингінде сегіз орынға көтерілді

Фото: Оңалхан Өнерхан

Астана наурыз айында жарияланған алдыңғы басылыммен салыстырғанда сегіз орынға көтеріліп, Жаһандық қаржы орталықтары индексінде (GFCI 40) 57-ші орынға ие болды, деп хабарлайды Elordainfo.kz ҚазАқпаратқа сілтеме жасап.

Алматы жеті орынға көтеріліп, 92-ші орынға көтерілді.

Жаңа Жаһандық қаржы орталықтары индексін құрастыру үшін 139 қаржы орталығы талданды. Негізгі индекске 117 орталық енгізілді, тағы 22 орталық қосу критерийлеріне сәйкес келуге жақын.

Индекстің алдыңғы басылымындағыдай, жетекші қаржы орталықтарының рейтингінде аз ғана өзгерістер болды. Нью-Йорк бірінші орынды сақтап қалды және Лондоннан төрт ұпайға алда. Гонконг пен Сингапур Лондоннан сәйкесінше бір және екі ұпайға артта қалып отыр.

Айта кетерлігі, Астана алғаш рет GFCI рейтингіне 2018 жылдың наурыз айында кірді, 2023 жылдың наурыз айында аймақтың көшбасшысы атанған еді.

Еске сала кетсек, Қазақстан әлемдегі ең бейбіт елдер рейтингінде ТОП-50-ге енді.