Астаналық 10 мыңға жуық оқушы «Шаттық-2025» байқауына қатысып жатыр

Астанада балалар мен жасөспірімдер арасындағы «Шаттық-2025» 18-ші қалалық шығармашылық байқауы бастау алды. Оған қаладан 10 мыңға жуық оқушы қатысып жатыр, деп хабарлады Elordainfo.kz.

Жарыс бір ай бойы өтеді. Елордадағы 146 білім ошағынан 9 800 оқушы өз өнерлерін ортаға салады.

Олар халық әні мен хореографиясынан бастап театр өнері мен фотосуретке дейін – 20 номинация бойынша 10 жанрда сынға түседі.

Жарыс бірден бірнеше жерде өтіп жатыр. Сонымен, М.Өтемісұлы атындағы Оқушылар сарайында 7 мен 18 жас аралығындағы топтар қатысатын «Хореография» бағдарламасы басталды. Онда әртүрлі би стильдерінде 122 нөмір көрсетіледі.

Сондай-ақ Кәрім Мыңбаев атындағы №59 мектеп-лицейінде театрландырылған қойылымдар ұйымдастырылды. Мектеп оқушылары драма, мюзикл, әдеби-музыкалық шығармалар ұсынады. Ал Техникалық және көркем шығармашылық орталығында жас фотографтар айналадағы дүниенің өзіндік ерекшелігі мен көркем көрінісі бойынша жарысады.

«Шаттық» – бұл жай ғана байқау емес. Бұл – нағыз таланттар бағын ашатын шығармашылық кеңістік. Мұнда балалар өнер көрсетуді ғана емес, сонымен қатар бір-бірінен қолдау тауып, достар тауып, шабыттана бастайды. Бұл байқауда қаланың көптеген талантты өнерпаздары өсіп шықты», - деді Астана қаласы Білім басқармасының қосымша білім беру және тәрбие жұмысы бөлімінің басшысы Гүлфара Сарамбетова.

Айта кетейік, жеңімпаздардың есімдері 29 сәуірде байқаудың үздік шығармашылық нөмірлері ұсынылатын гала-концертте жарияланады.