Сарыарқа ауданында 13 жаңа қоғамдық кеңістік пайда болды

Биыл Сарыарқа ауданында 13 жаңа қоғамдық орын пайда болды. Оның ішінде 4-еуі бұрынғы бос жатқан аумақта абаттандырылып, 9 аумақта толықтай күрделі жөндеу жасалды, деп хабарлады Elordainfo.kz.

Қала әкімдігінің мәліметінше, абаттандыру жұмыстары аясында көше жиһаздары мен жаяу жүргінші жолдары жаңартылып, заманауи ойын алаңдары мен жайлы демалыс аймақтары жасақталды.

Тарихи көшелерді жаңарту аясында Біржан сал және Гете көшелерінде абаттандыру аяқталды. Оның ішінде, 15 мың м² астам тас төсемі ауыстырылып, 85-тен аса шойын шам бағаналары орнатылды. Сондай-ақ, үстел ойындарына арналған алаңдар мен жайлы демалыс аймақтары құрылды.

Сонымен қатар, ағаштар, бұталар мен сәндік өсімдіктерді отырғызу сынды кешенді көгалдандыру жұмыстары жүргізіліп, жергілікті суару жүйесі жайластырылды. Бұл жасыл желектердің көркін сақтап, олардың күтімін тұрақты түрде қамтамасыз етеді.