Нұра ауданында полиция бөлімшесі ашылды

Елорданың Нұра ауданы Ш.Айтматов көшесінің бойында жаңа полиция бөлімшесі ашылды, деп хабарлады Elordainfo.kz қала әкімдігінің ресми сайтына сілтеме жасап.

Полиция бөлімшесі алты мектепті, ондаған тұрғын үй кешені және екі сауда орталығын қамтитын болады. Ілияс Омаров көшесі, 21 мекенжайында орналасқан №62 учаскелік бөлімшеде азаматтарды қабылдау бөлмесі, кезекшілер бөлмесі, учаскелік инспекторларға арналған кабинеттер, ана мен бала бөлмесі бар. Станцияда 11 полиция қызметкері жұмыс істейді.

«Жаңа полиция бекеті тұрғындарға жылдам көмек беруге мүмкіндік береді және аумақтағы қауіпсіздікті күшейтеді. Алдағы уақытта қаланың қылмыс көп болатын орындарында тағы екі участок ашылады. Оның бірі «Шығыс» тұрғын үй кешенінде, екіншісі «Үркер» тұрғын алабындағы дене шынықтыру-сауықтыру кешенінде. Сонымен қатар, екі тұрғын үй кешенінде тұрғындардың бастамасымен учаскелік полиция қызметкерлеріне тегін кабинеттер бөлу мәселесі қарастырылып жатыр. Осы шаралардың барлығы қаладағы қауіпсіздік деңгейін арттыруға септігін тигізеді», - деді Нұра ауданының әкімі Ришат Тұрдыбеков.

Ашылу салтанатына Астана қалалық ПД бастығы Марат Төлебаев, аудандық полиция бөлімінің бастығы Қайрат Мәдиев және елорда мәслихатының депутаты Нұрлан Мүслім қатысты.

Марат Төлебаев полиция бөлімшесі қоғамдық тәртіпті сақтауға, қылмыстың, оның ішінде тұрмыстық зорлық-зомбылық пен жасөспірімдер арасындағы қылмыстың алдын алуға көмектесетінін атап өтті.

Айта кету керек, жаңа полиция пунктінің ашылуы Қоғамдық қауіпсіздік тұжырымдамасы аясында қаладағы қауіпсіздікті нығайту жөніндегі кешенді жұмыстың бір бөлігі болып саналады. Осы тұжырымдама бойынша пунктер ашудың басым міндеті – қауіпсіздік ортасын құру үшін құқық қорғау органдары азаматтармен өзара әрекеттесетін жұмыстың сервистік моделіне көшу.