Елордада «Жігіт сұлтаны-2025» қалалық байқауы өтті

Астана қаласындағы техникалық және кәсіптік білім беру ұйымдарының студенттері арасында ұлттық құндылықтарды дәріптеуге бағытталған «Жігіт сұлтаны-2025» қалалық байқауы өтті, деп хабарлады Elordainfo.kz.

Астана қаласы Білім басқармасының қолдауымен Астана қаласы әкімдігінің «Сервис және туризм колледжі» ұйымдастырған байқаудың ең басты мақсаты – қазақ халқының ұлттық мәдениетін насихаттау, салт-дәстүрін дәріптеу. Сонымен қатар жастардың дене шынықтыру мәдениетін арттыру және шығармашылық әлеуетін дамыту. Әрі жастарға өздерінің бойындағы спорттық, интеллектуалдық және шығармашылық қабілеттерін көрсетуге мүмкіндік беру.
Сайысқа Астана қаласының техникалық және кәсіптік білім беру ұйымдарынан 8 студент қатысты.
Астана қаласы әкімдігінің Сервис және туризм колледжі директоры Салтанат Басығараева қатысушыларға сәттілік, қазылардың жұмысына табыс тілеп, «бүгінгі байқауда нағыз жігіттің сұлтаны таңдалса» деген ниетін білдірді.

«Жігіт сұлтаны» байқауы колледжіміздің бастамасымен 2020 жылдан бастап дәстүрлі түрде ұйымдастырылып келеді. Бүгінгі байқауда қалалық колледждерден 8 студент бақ сынаса, олардың өнерін 250-дей көрермен тамашалады.

Олардың қатарында колледжіміздегі «Әжелер клубы», басқа оқу орындарынан келген жанкүйерлер және қазылар мүшелері бар. Жарысқа қазылық етуге қол күресінен халықаралық дәрежедегі спорт шебері, Қазақстан және Азия чемпионы, күш экстримі бойынша бірнеше дүркін рекорд иесі Тимур Спатаев сияқты танымал спортшы және басқа да актер, журналистер атсалысты», - деді Астана қаласы әкімдігінің Сервис және туризм колледжі директорының тәрбие жұмысы бойынша орынбасары Динара Әбелдинова.

Ұйымдастырушылардың айтуынша, байқау екі күнге жоспарланды. Алғашқы күнінде қатысушылар кір тасын көтеру, жүзу, садақ ату және асық ату сияқты спорттық сайыстардан күш сынасты. Ал сайыстың екінші күні қатысушылар бір-бірімен өнер таластырды. Яғни өз ата тегі мен туған жерін таныстырды, сұрақ-жауаптарға жауап берді және өздері жасаған қолөнер бұйымдарын көрсетіп, ән айту, поэзия оқу, музыкалық аспаптарда ойнау тәрізді бойларындағы басқа да таланттарын көрсетті.

«Астана қаласы әкімдігінің Сервис және туризм колледжінде орман шаруашылығы мамандығы бойынша 3-курста оқып жатырмын. Колледж атынан қатысып отырғандықтан, осы жарыста намысты қолдан бермеуге тырысамын. Кеше сайыстың бірінші кезеңінде спорттық сайыстардан 39 ұпай жинап, екінші орынға табан тіредім. Бүгін поэзия оқимын, қойылым қоямын. Жалпы, өзім Абайдың қара сөздерін жатқа айтамын. Республикалық деңгейдегі іс-шараларға қатысып, колледжде мәдени-бұқаралық іс-шаралардың үйлестірушісі де болып жүрмін. Болашақта өз мамандығыммен шектеліп қалмай, өнерімді де әрі қарай ұштай бергім келеді», - деді 
сайыс қатысушысы Алдияр Дүйсекеев.