Елордада қыс басталғалы 2 миллион текше метрден астам қар шығарылды

Астананың коммуналдық қызметтері тәулік бойы қар күреу жұмысын жүргізіп жатыр, деп хабарлайды Elordainfo.kz қала әкімдігінің ресми сайтына сілтеме жасап.

31 желтоқсан күні таңертең қар тазалау жұмысына 2,6 мыңнан астам жол жұмысшысы мен 1 346 арнайы техника шықты.

31 желтоқсанға қараған түні 1 829 ауыр жүк рейсімен 24 мың текше метрден астам қар шығарылды.

Айта кетейік, қыс басталғалы полигондарға 157 мыңнан астам рейспен 2 042 267 текше метр қар шығарылды.

Ең алдымен, ережеге сәйкес, жолдарда кептеліс болмас үшін қозғалысы өте қарқынды орындар тазартылады. Сондай-ақ қарқындылығы орташа учаскелер – алаңдар, вокзал маңы аумақтары, тротуарлар, әлеуметтік нысандарға кірме жолдар және т.б. тазартылады.

Орталық көшелерді, жолаушылар көлігі маршруттары жүретін орындарды, аялдамалар мен тротуарларда тазалау да басымдыққа ие.

Қалада бірнеше жабдықталған қар полигоны бар. Олар самосвал техникасының нөмірлік белгілерін оқу жүйесімен жабдықталған, мұнда бейнебақылау камералары орнатылып, жарықтандыру қосылған.

«Елорда тұрғындары мен қонақтарынан жолдарда абай болуды, қауіпсіздік ережелерін сақтауды, дауылды ескерту болған жағдайда алыс сапарларға шықпауды сұраймыз.

Төтенше жағдай туындаған кезде «112» нөміріне хабарласыңыз», - делінген хабарламада.