Елордада S.O.S. әлеуметтік драмасының кезекті қойылымы өтті

Астана қаласы әкімдігінің Музыкалық жас көрермен театрында нашақорлықтың алдын алуға және есірткі қылмысына қарсы іс-қимылға арналған S.O.S атты драма жанрындағы кезекті қойылым өтті, деп хабарлады Elordainfo.kz.

Драматург Мәдина Омарованың туындысында қазіргі қоғамдағы ең өзекті мәселелердің бірі - нашақорлық және оның зардаптары бір отбасының трагедиясы арқылы көрсетілді.  

«Нашақорлық – бүгінгінің ең үлкен дерті. Сондықтан да біз бұл әлеуметтік драманың атын S.O.S. деп атадық. Осылайша көпшілікке дабыл қағу арқылы нашақорлықтың алдын алуға өз үлесімізді қоспақшымыз. Өйткені адамдардың психологиясына тән нәрсе, бұл -  басты кейіпкеріміз сияқты еліктегіштік, мол ақшаға қызығушылық. Әсіресе оң, солын танып үлгермеген жасөспірімдердің тағдыр тәлкегіне түсуі әп-сәтте. Бас кейіпкер Айбар да ойланбастан теріс қадам жасайды, қателікке ұрынады. Ал бұл бара-бара үлкен қайғыға ұшырататынын кеш түсінеді. Біздің кейіпкеріміздің де тап келген қателіктерінің салдарынан анасы жалғыз қалды, қарындасының өмірі быт-шыт болды, ағасы түрмеге түсті. Бұл бір отбасы және оның айналасындағылардың басынан өткен оқиға ғана, ал «есірткіге елітіп, көлеңкелі бизнеске үйір болғандардың қатары көбейсе, қоғамдағы жағдай қандай болмақ?» деген ойға қаласың. Иә, нашақорлық және есірткі бизнесі ешқашан жақсылыққа апармайды, бұл жолға қадам басқандардың алдынан тек қана қара түнек күтіп тұрмақ. Біз осыны көрерменге жеткізгіміз келді», - деді спектакльдің қоюшы режиссері, мәдениет саласының үздігі Аман Ғұмаров.

Спектакльде басты кейіпкер Айбар рөлінде Бибол Байғараев, Абзал Арапов болса, Айбарша рөлін Аружан Бағзат пен Арелана Амангелдиева сомдайды. Ал анасының рөлін «Құрмет» орденінің иегері Майра Омар мен Ақниет Замзат орындайды. Ал есірткі сататын топтың басшысы рөлін Қазбек Есқара ойнады. 

«Мен спектакльдегі жағымсыз кейіпкердің рөлін ойнадым. Рөлді сомдарда режиссермен ақылдастық. Жасөспірімдерді жаман әдеттерден сақтандыру үшін қойылған спектакль болғандықтан, режиссердің актерлерге бірқатар арнайы талап-тілегі болды. Сонымен қатар біз, актерлер де өз ой-пікірімізді ұсынып, қойылымды бірге жасап шықтық. Мен де ойымдағы кейіпкердің бейнесін сахнаға алып шығуға тырыстым.  Яғни, есірткі сатушы топтың бастығын әдепкідей біржақты зұлым, қатыгез кейіпкер ғана емес, әлдебір психологиялық соққылардың салдарынан ауруға айналған адам ретінде де көрсетуге тырыстық. Аталған кейіпкер спектакльдің өн бойында көріне бермейді, дегенмен рөлді сомдауға біраз іздендік», - деген пікірімен бөлісті Қазбек Есқара. 

Айта кетейік, қойылым елордада есірткі қылмысына қарсы іс-қимыл жөніндегі кешенді жоспарды және нашақорлықтың алдын алу жөніндегі «Астана – есірткісіз қала» акциясын іске асыру шеңберінде ұсынылған болатын. Көрермендердің пікірінше, S.O.S. өзіне жүктелген сенім мен мақсатты ақтады. Өйткені спектакльдің жастардың көңілдерінен шыққандары соншалық - олар қойылымды екінші мәрте көруге келіпті. 

«Спектакльде  есірткінің бір адамға ғана емес, сонымен бірге оның отбасы, басқа да адамдарға қандай зиян, кесірін тигізетіні көрсетілді. Драмада бас кейіпкердің мұндай жолға қалай келгені туралы айтылады. Қойылымның идеясынан көрермен өмірде сан қилы қиындықтарды басынан өткерсе де, адамның морт сынбай, керісінше оған төтеп беру қажеттігін ұғынады. Жеңіл ақшаның соңында кеткен жан өз өміріне, болашағына балта шабатынын, өзінен кейінгілерге де кері әсерін тигізетінін түйсінеді. Сондықтан жасөсірімдер бұл спектакльге көбірек келгені дұрыс деп есептеймін. Бұл - ой саларлық дүние», - деді университет студенті Ерке Әбілғалы.