Елордада қар күреуге 2 600-ге жуық жұмысшы шықты

Соңғы бірнеше күнде Астанада толассыз қар жауды. Қала тұрғындарының жайлы қозғалысын қамтамасыз ету үшін коммуналдық қызметтер тәулік бойы күшейтілген ауысымды режимде қар күреу жұмысын жүргізіп жатыр, деп хабарлады Elordainfo.kz.

25 желтоқсанға қараған түні коммуналдық қызметтер елордадан 3 626 рейспен 46 мың текше метр қар шығарды.

25 желтоқсандағы күндізгі ауысымда қар тазалау жұмысына 2 599 жол жұмысшысы және 1 579 арнайы техника жұмылдырылды.

Қыс мезгілі басталғалы полигондарға қаладан 126 797 рейс арқылы 1,6 млн текше метрден астам қар шығарылды.

Ең алдымен, ережеге сәйкес, жолдарда кептеліс болмас үшін қозғалысы өте қарқынды орындар тазартылады. Сондай-ақ қарқындылығы орташа учаскелер – алаңдар, вокзал маңы аумақтары, тротуарлар, әлеуметтік нысандарға кірме жолдар және т.б. тазартылады.

Орталық көшелерді, жолаушылар көлігі маршруттары жүретін орындарды, аялдамалар мен тротуарларда тазалау да басымдыққа ие.

Қалада бірнеше жабдықталған қар полигоны бар. Олар самосвал техникасының нөмірлік белгілерін оқу жүйесімен жабдықталған, мұнда бейнебақылау камералары орнатылып, жарықтандыру қосылған.

«Елорда тұрғындары мен қонақтарынан жолдарда абай болуды, қауіпсіздік ережелерін сақтауды, дауылды ескерту болған жағдайда алыс сапарларға шықпауды сұраймыз.

Төтенше жағдай туындаған кезде «112» нөміріне хабарласыңыз», - делінген хабарламада.