«Елорда Жастары» баспаналы болудың тиімді жолы – бағдарламаға қатысушы

Бүгінде көптеген астаналық жастар «Елорда Жастары» бағдарламасы арқылы баспаналы болуда. Бұл бағдарлама ұсынып отырған тиімді несиелеу арқылы жүзеге асып отыр, деп хабарлады Elordainfo.kz.

Елордалық Алдияр Орынбасардың отбасы аталған бағдарлама туралы 2019 жылы естіп, балдық жүйе арқылы бағаланатын байқауға қатысуға бел буады.

«Жұмыс орны, бала саны, тағы да басқа шарттар бойынша жоғары балл жинап, байқаудан жеңіп шықтық. Бес жылдың ішінде бастапқы 10% жарнаны жинап, мемлекеттің арқасында 5% несиелеумен төлем жағынан ыңғайлы үй алдық. Яғни 18 млн теңге тұратын еуро үлгідегі екі бөлмелі пәтерді 14 жылға несиеге алдық. Енді жөндеу жұмыстары аяқталған соң, жаңа баспанамызға көшеміз. Бұл бағдарламаның тағы бір тиімділігі - жастардың бастапқы жарнаны жинап алуына мүмкіндік беру үшін жалдау шартымен баспана береді. Сол кезде отбасымызда бір баламыз ғана болғандықтан, бізге кең бір бөлмелі пәтерден берді. Айына 6600 теңге ғана төлейтінбіз. Бұл жастар үшін өте тиімді, ал еңбекақымызды болашақ үйіміздің алғашқы жарнасына жинап отырдық», - деген Алдияр Орынбасар елордалық жастарға қызмет етіп, бағдарламаға қатысып, баспаналы болуға кеңес берді.

Астана қаласы әкімдігінің «Тұрғын үй қоры» коммуналдық мемлекеттік мекемесінің мәліметінше, «Елорда Жастары» бағдарламасы жастарға жылдық 5% мөлшерлеме бойынша жеңілдетілген несие беруді көздейді, несие сомасы 20 млн. теңгеге дейін болса, бастапқы жарнасы 10%, ал несиелеу мерзімі 19 жылға дейін. Бағдарлама аясында жастардың бастапқы және қайталама нарықта тұрғын үй сатып алу мүмкіндігі бар.

Бағдарламаға енгізілген түзетулерге сәйкес, 2023 жылғы наурыздан бастап қатысушылардың жасы 34 жасқа дейін өсті.

Биылғы 17 ақпаннан бастап Тұрғын үй орталығы «Отбасы банкі» АҚ «Елорда Жастары» бағдарламасы бойынша қолданыстағы жалдау шарттары бар 778 азаматқа несие беру рәсімдерінен өтуге жолдама берді.

2 cәуірде 778 азаматтың 370-і төлем қабілеттілігі рәсімінен өтіп, оның ішіндегі 200-і нарықтан тұрғын үй сатып алды, ал қалған азаматтар бойынша жұмыс әрі қарай жалғасуда.

«Елорда Жастары» бағдарламасы бойынша жұмыс істейтін жастарға несие беру ағымдағы жылдың соңына дейін жүзеге асырылмақ.