Астанада LRT депосының құрылысы басталды

Астанада қысқы кезеңнің басталуымен LRT жобасының негізгі инфрақұрылымдық нысаны – депоның құрылысы басталды. Ол Халықаралық әуежай маңайындағы 16,84 га аумақта орналасады, деп хабарлады Elordainfo.kz.

Депо LRT жүйесіне техникалық қызмет көрсету және басқару орталығына айналады.

«Депо ғимараттарының жалпы ауданы шамамен 80 мың м² құрайды. Онда жылжымалы құрамға толыққанды техникалық қызмет көрсету және жөндеу үшін қажетті барлық нысандар орналастырылады. Кешен вагондарды жуу ғимаратынан, қосалқы бөлшектер мен жабдықтар қоймаларынан, жолдарды жөндеуге арналған арнайы техника, сондай-ақ қызметкерлерді оқыту және біліктілігін арттыруға арналған әкімшілік ғимараттардан тұрады», - делінген CTS хабарламасында.

Депо аумағында пилотсыз пойыздарды басқару орталығы да құрылады. Автоматтандырылған басқару жүйесі қауіпсіздік пен тиімділікті едәуір арттыруға мүмкіндік береді, сондай-ақ іске қосу, тежеу және станцияларда тоқтау сияқты процестерді автоматтандырып, адами фактордың әсерін барынша азайтады.

Эстакада бойынша негізгі құрылыс жұмыстарының аяқталуына байланысты, қысқы кезеңде құрылыс технологиясына сәйкес, LRT жобасының жұмыстары депо құрылысына шоғырланады.