Астанада аутизмге шалдыққан балаларды қолдауға арналған концерт өтті

«Астана Опера» театрының камералық залында аутизм мәселесі туралы Бүкіләлемдік ақпарат тарату күніне орайластырылған концерт өтті, деп хабарлады Elordainfo.kz.

Концерт басталар алдында қонақтар аутизммен ауыратын балалар жасаған суреттер мен қолөнердің бірегей көрмесін тамашалады. Өнер арқылы олар өздерін қызықтыратын және шабыттандыратын нәрселер туралы айтты.

«Концертке ел Тәуелсіздігі тақырыбында сурет салдым. Бұл – өзім ойлап тапқан коллаж. Онда біздің керемет таулар, ашық көк аспан, бүркіт, жалау және ат үстіндегі шабандоз бейнеленген. Мен халқымыздың рухы мен мереке рухын көрсеткім келді», - дейді бірінші сынып оқушысы Әли Айнабек.

Еліміздің бас театрының сахнасында елордаға түрлі өңірлерден – Қостанай, Петропавл, Өскемен, Қарағанды, Семей, Астана және өзге де қалалардан келген аутизмге шалдыққан дарынды балалар өнер көрсетті. Олар әртүрлі тілдерде ән шырқады, заманауи билер ұсынды, музыкалық және актерлік шеберліктерін көрсетті.

Ұйымдастырушылардың айтуынша, іс-шара бүкіл ел бойынша арнайы мектептер мен қорларды біріктіретін игі дәстүрге айналды.

«Біз бұл концертті төртінші жыл қатарынан өткізіп келеміз. Біздің мақсатымыз – аутизмі бар балалардың басқалар сияқты дарынды екенін көрсету. Олар сурет салады, ән айтады, билейді, мүсіндейді, музыкалық аспаптарда ойнайды. Мұны сахнада орындай отырып, олар өздерінің қабілеттерін ашып қана қоймай, қоғамның бір бөлігіне айналады», - деп атап өтті Abaqus-Daryn жеке білім беру қорының директоры Дархан Ажмолдаев.

«Нұра» ауданы әкімінің орынбасары Әлия Әбсеметова осындай бастамалардың маңыздылығы жайында айтты.

«Мұндай концерттер бізді тәнті етіп қана қоймай, қоғамның көзқарасын өзгертуі керек. Ерекше балалардың қоғамға бейімделуі – тек қажеттілік қана емес, бұл баршамыздың ортақ міндетіміз. Біз оларға сапалы білім, дамуға арналған қолайлы жағдай жасап, қолдау көрсеткенде ғана нағыз мықты қоғам құра аламыз», - деді ол.