Іздеу Астанада қанша аула клубы жұмыс істейді
Олжас Сүлейменов
Астанада 10 жылдан бері тұрғылықты жері бойынша балалар мен жасөспірімдердің бос уақытын тиімді пайдалануға бағытталған «Аула клубтары» әлеуметтік жобасы табысты жұмыс істеп келеді, деп хабарлады Elordainfo.kz қала әкімдігінің ресми сайтына сілтеме жасап.
Жоба Астана қаласы әкімдігінің «Астана жастары» жастар ресурстық орталығының аула клубтарын дамыту бөлімінің жетекшілігімен жүзеге асырылуда.
Бүгінгі таңда қалада 2 500-ге жуық тәрбиеленушіні қамтитын 10 аула клубы жұмыс істейді. Бұл, негізінен, халықтың әлеуметтік осал топтарынан шыққан балалар мен жастар.
«Алматы» ауданында 4 клуб жұмыс істейді: «Қыран», «Жас қанат», Tahtay, «Армандастар».
«Байқоңыр» ауданында «Бәйтерек» клубы бар.
«Есіл» ауданында «Ақжол» клубы жұмыс істейді,
«Сарыарқа» ауданында 3 клуб жұмыс істейді: «Динамо», Profit, SABAT FIGHT CLUB.
«Нұра» ауданында «Үркер» клубы жұмыс істейді.
Аула клубтары 130 түрлі үйірмелер мен секцияларды ұсынады. Олардың 74-і – спорттық, 56-сы – шығармашылық. Клубтардағы барлық сабақтар тегін өткізіледі.
Тәрбиеленушілерді қабылдау процесі iKomek109 бірыңғай байланыс орталығы арқылы жүзеге асырылады. Сондай-ақ әлеуметтік желілер арқылы клубтар туралы ақпарат алуға және сабаққа жазылуға болады.
