Астана әкімдігінің атынан балаларға арналған жаңа жылдық шырша мерекесі өтті

Астанадағы Президенттік орталықта әкімдік атынан елорданың бүлдіршіндеріне арналған жаңа жылдық шырша мерекесі өтті, деп хабарлады Elordainfo.kz.

Жаңа жылдық мереке 400-ден астам баланың басын қосты Олардың арасында көпбалалы, әлеуметтік аз қамтылған отбасылардың балалары, мүмкіндігі шектеулі, жетім балалар, ерекше білім алуды қажет ететін балалар, сонымен қатар мектепте, спортта және шығармашылықта жетістіктерге жеткен дарынды оқушылар бар.

Іс-шараның салтанатты ашылуында Астана қаласы әкімінің орынбасары Есет Байкен сөз сөйлеп, жылы лебізін білдірді.

«Құрметті достар, біздің жас таланттар! Жаңа жыл құтты болсын! Бұл армандар, тілектер мен үміттер орындалатын, қиял әлеміне ой жүгіртетін қуанышты сәттердің уақыты. Ғажайыпқа толы бұл күнді біз асыға күтеміз. Бұл тамаша жиынға дарынды, зерделі, шығармашыл оқушылармен қатар, халықаралық байқаулардың жеңімпаздары да қатысып жатыр. Жаңа жылда армандарыңыз орындала берсін», – деді Есет Байкен.

Мерекелік бағдарлама ертегі кейіпкерлерінің арқасында ерекше өтті. Қазақ және әлемдік ертегілер кейіпкерлерінің киімін киген жүргізушілер мен аниматорлар мерекелік көңіл-күй сыйлады.

«Іс-шараның сценарийі балаларға өз қабілеттерін ашуға көмектеседі, сондай-ақ оларды үлкендерді құрметтеуге және өзгелерге ілтипатпен қарауға үйретеді. Тек оқудағы жетістіктерге ғана емес, адамгершілік құндылықтарды қалыптастыруға да көңіл бөлу маңызды», – деді Астана қаласы Білім басқармасы басшысының орынбасары Серік Әділбаев.

Мерекелік бағдарлама аясында «Витебсктегі славян базары» және «Голос. Дети», сондай-ақ танымал қазақ эстрадасының жұлдыздары, оның ішінде Ринат Малцагов өнер көрсетті. Ертегі дизайнында бейнеленген дөңгелек LED-экрандарда көрсетілетін ерекше графикалық контент жаңа жылдық жиынның көркін ашты.

«Баршаңызға Жаңа жыл құтты болсын! Бұл – ғажайыпқа толы уақыт. Балаларға қуаныш сыйлаған осындай тамаша шырша үшін әкімдікке мың алғыс. Біз балаларымызға осындай қуанышты сәттер жасалғанына сондай қуаныштымыз!» – деп атап өтті ата-аналардың бірі Өміржан Есетов.

Зал 10 метрлік шыршамен көркемделіп, жарқыраған кристалдар түрінде безендірілді. Балалар Аяз атамен, Ақшақармен кездесті, олар кішкентай қонақтарды құттықтап, сиқырлы сәттер сыйлады.

«Маған мереке өте ұнады. Өте көңілді болды. Көптеген жарқын қойылымдарды көрдім, ал шырша өте үлкен және әдемі болды. Қатысқаныма өте қуаныштымын!» - деп шараға қатысушылардың бірі, №91 гимназияның 4-сынып оқушысы өз әсерімен бөлісті.