«Астана Опера» әртістері осы театр маусымында марапат қоржынын 28 жеңіспен толықтырды

Осылайша, оркестр музыканттары Дамиля Махпирова (гобой), Алексей Косырев (флейта), Алмас Тоқпанов (кларнет), Әсет Нелдібаев (фагот), Марат Қонысбаев (валторна) «Бессарабия дарындары» халықаралық фестивалінде (Белгород қ.), «Поволжьенің күміс кернейлері» 24-ші фестивалінде, сонымен қатар «Golden star» (Одесса қ., Украина) халықаралық байқауында бірінші жүлделерді алды. Әйгерім Дәуітбаева (флейта) «Мұра» І халықаралық орындаушылар байқауында (Прага қ., Чехия) Гран-при иеленді. Оркестр музыканттары Әйгерім Дәуітбаева, Мақсат Сүлейменов, Ерболат Тәшкенбаев «Дарындардың жаңа жылдық калейдоскопы» (Мәскеу қ., Ресей) халықаралық көпжанрлы байқауында театрға Гран-при әкелді. Назаров Шернияз (фагот) Должиков атындағы ІХ халықаралық фестиваль-байқауы мен Халилов атындағы «Воронеж үрлемелі аспаптар ассамблеялары» халықаралық фестивалінде (Воронеж қ., Ресей) бірінші орын иеленді. Әсет Нелдібаев (фагот) «Camerton competition» халықаралық байқауында (Мәскеу қ., Ресей) бірінші орын алды. Тромбоншы Фархад Болатов П.И.Чайковский атындағы ММК, «Grand Music Art» VIII халықаралық байқауы мен П.И.Чайковский атындағы ММК, Р.М.Глиэр атындағы IV халықаралық музыкалық байқауында (Мәскеу қ., Ресей) I дәрежелі лауреат атанды. Төрт Гран-при иегері, Қазақстанның еңбек сіңірген қайраткері, балет труппасының жетекші солисі Бақтияр Адамжан «Dance Open» халықаралық балет фестивалінде (Санкт-Петербор қ., Ресей) Үлкен театрдың солисі Анастасия Сташкевичпен керемет дуэт орындады. Әлемдегі ірі балет фестивальдерінің түгел дерлігі Бақтияр Адамжанның қатысуынсыз өтпейтіндігін айта кеткен жөн. Сондай-ақ басқа да көптеген әртістер түрлі халықаралық байқауларда жүлделі орындарды иеленді. Олардың барлығы мұндай жеңістің жаңа мақсаттарға қол жеткізуге ынталандыратынын, сондай-ақ құрамында танымал музыкалық халықаралық агенттіктер мен опера үйлерінің өкілдері бар кәсіби әділ-қазылардан шарт бойынша шақырту алуға тамаша мүмкіндік беретіндігін баса айтты.