Елімізге жеңілдікпен 12 мыңға жуық электромобиль әкелуге болады

 Бүгінгі таңда ҚР аумағына жолаушылар кедендік декларациясы бойынша кедендік баждар мен салықтарды төлеуден босатыла отырып, 3442 электромобиль әкелінді, деп хабарлады Elorda.info 

Бұған дейін Еуразиялық экономикалық комиссия кеңесінің 2022 жылғы 17 наурыздағы № 39 шешімімен 2022 және 2023 жылдары электромобильдерге бажсыз әкелу мүмкіндігі берілген болатын. ЕЭК шешіміне сәйкес 2023 жылы электромобильдерді жеңілдікпен әкелуге берілген рұқсат 15 мың электромобиль бірлігін құрайды.

Мемлекеттік кірістер комитеті баспасөз қызметінің мәліметінше 2023 жылдың соңына дейін кедендік баждар мен салықтарды төлеуден босатыла отырып тағы 11558 электромобиль әкелуге мүмкіндік бар көрінеді

 Қазіргі уақытта Қырғыз Республикасының бастамасы бойынша Еуразиялық экономикалық комиссия алаңында бажсыз әкелу мүмкіндігін 2025 жылға дейін ұзарту туралы мәселе қаралып жатқанын атап өту маңызды,-делінген комитет таратқан ақпаратта. 

     Алайда, жоғарыда аталған үлес шеңберінде кедендік баж салығын төлеуден босатып, бірақ ҚҚС төлей отырып, электромобильді әкелудің басқа мүмкіндігі бар екенін ескеру маңызды. Бұл жағдайда Дүниежүзілік сауда ұйымының мөлшерлемелері бойынша тауарларға декларация тапсыру қажет.