«Қазсушар» каналдарды реконструкциялау бойынша 7 жоба әзірледі

Фото: Су ресурстары және ирригация министрлігі

«Қазсушар» РМК өз күшімен магистральдық каналдарды реконструкциялау бойынша 7 жобаны әзірледі. Бұл кәсіпорынға 583,2 млн теңге үнемдеуге мүмкіндік берді, деп хабарлайды Elordainfo.kz Су ресурстары және ирригация министрлігіне сілтеме жасап.

Қазір барлық жоба мемлекеттік сараптамадан өтіп, оң қорытынды алды. Жобалардың алтауы Жамбыл облысының Байзақ және Жамбыл аудандарындағы магистральдық каналдарды бетондау жұмыстарын қамтиды. Ал бір жоба Павлодар облысындағы Қ.Сәтбаев атындағы каналдағы бөгеттердің бірін реконструкциялауға бағытталған.

«Жобаларды кәсіпорын мамандары өздері, үшінші тарапты тартпай-ақ әзірледі. Бұл қомақты қаражатты үнемдеуге мүмкіндік берді. Сонымен қатар қаржы-шаруашылық қызметті оңтайландыру аясында «Қазсушар» РМК техника паркі 27%-ға жаңартылды. Соның арқасында техниканы жалға алу шығыны 85%-ға қысқарып, оны жөндеуге кететін шығын екі есе азайды», - деді Су ресурстары және ирригация вице-министрі Ерболат Ибрайханов.

Бұған дейін Батыс Қазақстан облысында Жайықтағы су тасқынына дайындық жүргізіліп жатқанын жаздық.

#Қазсушар