Қазақстанның сыртқы сауда айналымы төрт айда 44,9 млрд доллар болды

Фото: Оңалхан Өнерхан

Қазақстанның сыртқы саудасында негізгі халықаралық серіктестермен тауар айналымы тұрақты өсіп келе жатыр, деп хабарлайды Elordainfo.kz Ұлттық статистика бюросына сілтеме жасап.

2026 жылдың қаңтар-сәуір айларының қорытындысы бойынша Қазақстанның сыртқы сауда айналымы 44,9 млрд $ болып, өткен жылдың сәйкес кезеңімен салыстырғанда номиналды түрде 7,9% артты.

«Экспорт көлемі 24 млрд $, ал импорт көлемі 20,9 млрд $ құрады. Қазақстанға тауар жеткізуші ірі елдердің қатарында Ресей (6,6 млрд $), Қытай (6 млрд $), Германия (1 млрд $), АҚШ (0,9 млрд $) және Оңтүстік Корея (0,5 млрд $) болды.

Қазақстан экспортының негізгі бағыттары Қытай (4,9 млрд $), Италия (4 млрд $), Ресей (2 млрд $), Түркия (1,7 млрд $) және Өзбекстан (1,4 млрд $) елдері болды», делінген хабарламада.

Бюроның мәлімдеуінше, 2026 жылғы қаңтар-сәуір айларындағы көрсеткіштер Қазақстанның сыртқы саудасында оң динамиканың сақталғанын және негізгі халықаралық серіктестермен тауар айналымының тұрақты өсіп келе жатқанын көрсетеді.

Еске сала кетсек, Қазақстан Иранның ең ірі портында көлік-логистикалық терминал салады.