Қазақстан-Қытай: Бейжіңде теміржол көлігі жөніндегі кіші комитеттің 16-отырысы өтті

Фото: ҚР Көлік минитсрлігі

Бейжің қаласында Қазақстан-Қытай теміржол көлігі саласындағы ынтымақтастық жөніндегі шағын комитеттің 16-отырысы өтті, деп хабарлайды Elordainfo.kz ҚР Көлік министрлігінің баспасөз қызметіне сілтеме жасап.

Жиынға ҚР Көлік вице-министрі Жәнібек Тайжанов пен ҚХР Мемлекеттік теміржол басқармасы басшысының орынбасары У Дэджин тең төрағалық етті.

Отырыс барысында Қазақстан мен Қытай арасындағы теміржол тасымалдарының қазіргі жағдайы мен даму перспективалары, сондай-ақ транзиттік әлеуетті арттыру мәселелері қаралды.

Тасымал көлемінің өсуінің оң серпіні және теміржол инфрақұрылымын жаңғырту бойынша жүргізіліп жатқан жұмыстар аталып өтті.

Тараптар Транскаспий халықаралық көлік бағытының стратегиялық маңызын атап өтіп, оны одан әрі дамытуға мүдделілігін растады. Оның ішінде Ақтау және Құрық порттарының инфрақұрылымын жаңғырту, 2029 жылға қарай контейнерлік транзит көлемін 3 мың пойызға дейін жеткізу көзделіп отыр.

Отырыс қорытындысы бойынша транзитті дамыту және тасымал көлемін ұлғайту жөніндегі ұзақ мерзімді бағдарламаны әзірлеу туралы келісімге қол жеткізілді. Бағдарлама шекаралық және порттық инфрақұрылымды үйлесімді дамыту, көлік-логистикалық хабтарды қалыптастыру және дамыту, сондай-ақ теміржол машина жасау саласындағы ынтымақтастықты кеңейтуді көздейді. Сонымен қатар тараптар цифрлық шешімдерді енгізуді жалғастыруға келісті.

Бұған дейін елімізде пойыз қозғалысын басқаруға Starlink спутниктік жүйесі енгізілетінін жаздық.