Іздеу Қазақстан боксшылары Азия чемпионатында топ жарды
Думан Аманжол
Моңғолияның Ұланбатыр қаласында өткен ересектер арасындағы бокстан Азия чемпионаты өз мәресіне жетті, деп хабарлайды Elordainfo.kz Туризм жəне спорт министрлігіне сілтеме жасап.
Финалдық жекпе-жектер нәтижесінде Қазақстан құрамасы кезекті, алтыншы алтын медалін жеңіп алды.
«Ерлер мен әйелдер арасындағы нәтижелерді біріктіргенде, қазақстандық боксшылар жалпыкомандалық есепте бірінші орынға көтерілді. Ұлттық құрама қоржынына барлығы 13 медаль түсті: 6 алтын, 2 күміс және 5 қола», - делінеді хабарламада.
Азия чемпиондары атанған спортшылар: Надежда Рябец (-80 кг), Дина Исламбекова (+80 кг), Оразбек Асылқұлов (-60 кг), Сабыржан Аққалықов (-75 кг), Нұрбек Оралбай (-85 кг), Айбек Оралбай (+90 кг).
Күміс жүлдеге ие болғандар: Бақыт Сейдіш (-70 кг) және Төрехан Сабырхан (-70 кг).
Қола медаль иегерлері қатарында Айгерім Сәттібаева (-48 кг), Валентина Хальзова (-75 кг), Махмұд Сабырхан (-55 кг), Ертуған Зейнуллинов (-65 кг) және Сағындық Тоғамбай (-90 кг) бар.
Жалпы есепте екінші орынды Үндістан құрамасы (5 алтын, 3 күміс, 8 қола) иеленсе, үшінші орынға Өзбекстан командасы (3 алтын, 4 күміс, 4 қола) тұрақтады. Сондай-ақ, биылғы чемпионатта барлығы 14 елдің боксшысы жүлдеге қол жеткізді.
Еске салсақ, Мемлекет басшысы бокстан Қазақстан ұлттық құрамасын Ұланбатырда өткен Азия біріншілігінде табысты өнер көрсетуімен құттықтады.
