Іздеу Конституция – саяси тұрақтылық пен азаматтық татулықтың негізі
Елорда ақпарат
Қазақстан Республикасының Конституциясы – мемлекетіміздің құқықтық жүйесінің өзегі, қоғам дамуының басты бағдары және елдегі саяси тұрақтылық пен азаматтық татулықтың берік кепілі. Ол мемлекеттің іргетасын айқындап қана қоймай, әрбір азаматтың құқықтары мен бостандықтарын қамтамасыз ететін негізгі заң болып табылады, деп хабарлады Elordainfo.kz.
Қазақстан Республикасының Конституциясы – мемлекетіміздің құқықтық жүйесінің өзегі, қоғам дамуының басты бағдары және елдегі саяси тұрақтылық пен азаматтық татулықтың берік кепілі. Ол мемлекеттің іргетасын айқындап қана қоймай, әрбір азаматтың құқықтары мен бостандықтарын қамтамасыз ететін негізгі заң болып табылады.
Конституция – қоғамдағы барлық саяси, әлеуметтік және экономикалық қатынастарды реттейтін жоғарғы құқықтық құжат. Оның басты мақсаты – мемлекет пен азамат арасындағы өзара жауапкершілікті айқындау, билік тармақтарының теңгерімін сақтау, заң үстемдігін қамтамасыз ету. Осы арқылы елде тұрақтылық пен келісім орнайды.
Қазақстан Конституциясында мемлекетіміздің ең қымбат қазынасы – адам және адамның өмірі, құқықтары мен бостандықтары екені нақты көрсетілген. Бұл қағида азаматтардың әлеуметтік шығу тегі, ұлты, тілі, діні немесе көзқарасына қарамастан, заң алдында теңдігін қамтамасыз етеді. Осындай теңдік пен әділеттілік қоғамда өзара сенім мен азаматтық татулықтың нығаюына негіз болады.
Саяси тұрақтылықтың маңызды шарттарының бірі – билік тармақтарының өзара тепе-теңдігі мен жауапкершілігі. Конституцияда заң шығарушы, атқарушы және сот билігінің өкілеттіктері нақты белгіленіп, олардың бірін-бірі тежеп, тепе-теңдік сақтауы көзделген. Бұл биліктің бір қолда шоғырлануына жол бермей, құқықтық мемлекет қағидаттарының жүзеге асуына мүмкіндік береді.
Сонымен қатар, Конституция азаматтық қоғам институттарының дамуына кең жол ашады. Қоғамдық бірлестіктер, саяси партиялар, бұқаралық ақпарат құралдары Конституциялық шеңберде еркін қызмет атқарып, қоғамдық пікірдің қалыптасуына ықпал етеді. Бұл өз кезегінде ашықтық пен диалог мәдениетін дамытуға, түрлі көзқарастардың заң аясында үйлесуіне жағдай жасайды.
Қазақстан – көпұлтты, көпконфессиялы мемлекет. Осындай алуан түрлі қоғамда азаматтық татулық пен қоғамдық келісімнің сақталуы ерекше маңызға ие. Конституцияда ұлтаралық және дінаралық келісім қағидаттары бекітіліп, кез келген кемсітушілікке тыйым салынған. Бұл нормалар еліміздегі бейбітшілік пен тұрақтылықтың құқықтық негізін қалыптастырады.
Қорытындылай келе, Қазақстан Республикасының Конституциясы – тек құқықтық құжат қана емес, ел бірлігін нығайтатын, саяси тұрақтылық пен азаматтық татулықты қамтамасыз ететін стратегиялық маңызы бар негізгі заң. Конституциялық қағидаттарды құрметтеу және сақтау – әрбір азаматтың борышы. Заң үстемдігіне негізделген қоғам ғана тұрақты дамуға, әділеттілік пен келісімге қол жеткізе алады.
Ж.Кукенова,
Астана қаласының мамандандырылған ауданаралық тергеу сотының
бас маманы – сот отырысының хатшысы
