Астана қаласында 2-7-сынып оқушылары арасындағы зерттеу жобалары мен шығармашылық жұмыстардың «Зерде» республикалық конкурсының қалалық кезеңі басталды, деп хабарлады Elordainfo.kz.

Байқау Астана қаласы әкімдігінің «Астана дарыны» дарынды балалар мен талантты жастарды анықтау және қолдау орталығының ұйымдастыруымен өтіп жатыр.

Байқаудың басты мақсаты – балалардың зерттеу дағдыларын дамыту, олардың интеллектуалдық және шығармашылық әлеуетін қолдау, түрлі ғылым салаларына қызығушылығын арттыру. Конкурсқа елорданың білім беру ұйымдарынан 2-7-сынып оқушылары қатысып, жаратылыстану-математикалық және қоғамдық-гуманитарлық бағыттар бойынша өз жобаларын ұсынып, бақ сынауда.

Байқау №117 жалпы орта білім беру мектебінің базасында өтіп жатыр. Алғашқы күні, 15 қарашада, медицина, психология, экология, химия және шет тілі секциялары бойынша 440 оқушы жобаларын қорғады.

22 қараша күні физика-космос, биология, информатика, робототехника және STEM инженерия бағыттарында 427 қатысушы өз жұмыстарын таныстырды. Қатысушылардың 500-ден астамы – 2-4-сынып, ал 350-ден астамы – 5-7-сынып оқушылары.

Күні кеше қазақ тілі мен әдебиеті, орыс тілі мен әдебиеті, тарих, өлкетану, туризм және спорт, этномәдениеттану, технология және өнер секциялары бойынша 600-ге жуық оқушы өзара бақ сынады.

Жалпы конкурсқа Астана қаласының білім беру мекемелерінен 1 500-ге жуық өтінім қабылданған. Бұл балалардың ғылым мен шығармашылыққа деген ерекше қызығушылығын көрсетеді.