Іздеу Бас штаб бастығы сержанттардың жалпыәскерлік кеңесіне дайындығын тексерді
Жәнібек Амангелді
Алматы, Гвардейск және Қонаев гарнизондарына жұмыс сапары барысында Қорғаныс министрінің бірінші орынбасары – Қарулы күштер Бас штабының бастығы генерал-лейтенант Қаныш Әбубәкіров бөлімшелердің жауынгерлік даярлығын тексеріп, әскери инфрақұрылым нысандарын инспекциялады, деп хабарлайды Elordainfo.kz Қорғаныс министрлігіне сілтеме жасап.
Сағадат Нұрмағамбетов атындағы Құрлық әскерлерінің әскери институтында ол командалық құрамға оқу бағдарламаларын қазіргі заман талаптарына сәйкестендіру, олардың практикалық бағытын күшейту және цифрлық технологияларды енгізу қажеттігін атап өтті.
Сапар аясында алғашқы парашюттен секірген курсанттарға десанттық бауырластық нышаны – көгілдір берет пен флотшылардың жолақты жейдесін табыстау рәсімі өтті.
Гвардейск гарнизонында Бас штаб бастығы «Оңтүстік» өңірлік қолбасшылығы әскерлерімен өткізілген көпсатылы командалық-штабтық оқу-жаттығудың қорытынды кезеңін бақылады. Оқу-жаттығу басқару жүйесінің тұрақтылығын арттыруға, штабтардың іс-қимылдарын үйлестіруге және заманауи атыс құралдары мен барлау, соның ішінде дронді тиімді қолдануға бағытталды.
Жауынгерлік жағдайға барынша жақын жағдайда бөлімшелер траншеялық ұрыс жүргізу және шағын топтар құрамында әрекет ету дағдыларын пысықтады. Командалық-бақылау пункттерінің жұмысы, байланыс жүйесі, сондай-ақ техникалық және тылдық қамтамасыз ету тексерілді.
Қорытындылай келе, генерал-лейтенант Қаныш Әбубәкіров басқару жүйесін жетілдіру, бөлімшелердің ұтқырлығын арттыру бойынша міндеттер қойып, «Батыл тойтарыс – 2026» стратегиялық командалық-штабтық оқу-жаттығуына дайындық жөнінде нақты тапсырмалар берді.
Қонаев гарнизонында «Іле» полигонының оқу-әдістемелік жиындар мен Сержанттардың жалпыәскерлік кеңесін өткізуге дайындығы бағаланды. Әкімшілік ғимараттар, оқу орындары, сондай-ақ қатысушыларды орналастыру және тамақтандыру нысандары қаралды.
Сапар аясындағы инспекциялау бөлімшелердің дайындық деңгейін және олардың міндеттерді орындауға әзірлігін айқындауға мүмкіндік берді. Оның қорытындысы бойынша басқару жүйесін жетілдіру және жеке құрамның практикалық даярлығын арттыруды қамтитын басым бағыттар белгіленді.
Еске салсақ, Қарулы күштерде заттай мүлікпен қамтамасыз етудің жаңа үлгілері енгізіледі.
