Іздеу 
Астанада шаңғы базасында алғашқы жаттығулар өтті
Кербез Әлішер
Жаңа шаңғы базасында биатлон мен шаңғы тебуден алғашқы жаттығу сабақтары ұйымдастырылды, деп хабарлады Elordainfo.kz қала әкімдігінің ресми сайтына сілтеме жасап.
Жаттығу барысын Астана қаласының Дене шынықтыру және спорт басқармасының басшысы Василий Левит арнайы барып көрді. Ол спортшылардың дайындығын бағалап, бапкерлермен алдағы жұмыстың ұйымдастыру мәселесін талқылады.
«Бүгін базада алғашқы биатлон және шаңғы тебуден жаттығулар өтті. Мен жеке жаттығу процесімен танысып, бапкерлер және жас спортшылармен сөйлестім. Сонымен қатар, мұнда спорттық бағдарлаумен айналысатын жас спортшылар да жаттығады. Шаңғы базасы толық жұмысқа дайын және штаттық режимде қызмет көрсетеді. Оқу-жаттығу процесін өткізу және түрлі деңгейдегі спортшыны даярлау үшін барлық қажетті жағдай жасалған», - деп атап өтті Василий Левит.
Базаның инфрақұрылымына мамандандырылған жабдықтармен, соның ішінде «ERCOLINA» тренажерімен жабдықталған кең жаттығу залы кіреді.
Инновациялық жабдыққа ерекше назар аударылады: жыл бойы техниканы шынықтыруға және конькимен сырғанау техникасын имитациялауға, жылдамдық пен көлбеу бұрышты меңгеруге мүмкіндік беретін төзімділікті арттыруға арналған «Skate Treadmill RL3500E» кәсіби тренажері орнатылған. Бұл тренажер жүктемелердің қарқындылығын дәл реттеуге, мамандардың бақылауымен қауіпсіз жаттығу жасауға және прогресті объективті әрі жүйелі бағалауға мүмкіндік береді. Бұл - спортшыны даярлауда өте маңызды.
Сонымен қатар, шаңғылар мен спорттық жабдықтарды дайындау, сақтау және кептіру үшін арнайы үй-жайлар қарастырылған.
«Мен биатлоннан аға жаттықтырушымын. Қазіргі уақытта бізде 90-ға жуық бала жаттығады. Бүгін жаңа шаңғы базасы жұмысын бастады және ол бізге ұнады. Балалар қуанышты — біз бұны көп күттік. Астанада алғаш рет жабдықтарды сақтайтын және балалар киім ауыстыра алатын база пайда болды. Біз өте ризамыз. Бізді қарсы алып, бәрін көрсетіп, түсіндірді, қолайлы жағдай жасады. Осы іске атсалысқан жандардың барлығына рахмет», - деді биатлоннан жаттықтырушы-оқытушы Евгений Тюлегенев.
Жаңа шаңғы базасы балалар мен жасөспірімдер спорт мектебінің, Олимпиадалық резервті даярлау орталығының, Жоғары спорт шеберлігі мектебінің және бұқаралық спорт түрлері бойынша спорт клубтарының тәрбиеленушілерін даярлаудың негізгі алаңына айналады.
Шаңғы базасы күн сайын сағат 09:00-ден 19:00-ге дейін жұмыс істейді.
Бұған дейін елордада қысқы фестивальге 2 мыңнан астам қатысушы жиналғанын жаздық.
