Астанада қоғамдық қауіпсіздікті қамтамасыз ету шаралары күшейтілді

Фото: polisia.kz

Қазақстан Республикасы Ұлттық ұланының №5573 әскери бөлімінің аумағында қосымша күштердің, елордалық полиция қызметкерлері мен Ұлттық ұлан әскери қызметшілерінің қатысуымен жалпы гарнизондық саптық таралым өтті, деп хабарлайды Elordainfo.kz ІІМ баспасөз қызметіне сілтеме жасап.

Іс-шараға Астана қаласы Полиция департаментінің бастығы Марат Төлебаев, ҚР ІІМ әкімшілік полиция комитетінің төрағасы Мұрат Қабденов, сондай-ақ ҚР ІІМ арнайы күштер және жедел басқару департаментінің бастығы Сабыр Жүсіпбеков қатысты.

Саптық таралым маңызды қоғамдық-саяси іс-шаралар қарсаңында жеке құрамның қоғамдық тәртіпті сақтау, қоғамдық және жол қауіпсіздігін қамтамасыз ету міндеттерін орындауға дайындығын тексеру мақсатында ұйымдастырылды.

Іс-шара барысында полиция қызметкерлері мен Ұлттық ұлан әскери қызметшілеріне елорда аумағында қауіпсіздікті қамтамасыз ету, құқық бұзушылықтарға жедел ден қою, жол қауіпсіздігі деңгейін арттыру және тұрғындар арасында профилактикалық жұмыстарды күшейту бойынша нақты міндеттер жүктелді.

Сонымен қатар азаматтар көп жиналатын орындарда қоғамдық тәртіпті сақтау, тұрғындармен сыпайы әрі әдепті қарым-қатынас орнату мәселесіне ерекше назар аударылды.

Еске сала кетейік, ІІМ әлеуметтік желілер мен мессенджерлердегі аккаунттарды бөгде адамдарға беру жағдайлары көбейгенін мәлімдеді.