Ішкі істер министрлігі Ұлттық ұланының Бас қолбасшылығында әскери қызметшілер үшін Qaztest жүйесі бойынша диагностикалық тестілеу ұйымдастырылды, деп хабарлады Elordainfo.kz.

Тестілеудің негізгі мақсаты – жеке құрамның мемлекеттік тілді меңгеру деңгейін анықтау, сондай-ақ тілдік дағдыларды дамытуға бағытталған жүйелі жұмысты күшейту. Бұл өз кезегінде әскери қызметшілердің кәсіби коммуникация сапасын арттыруға, ресми құжат айналымында және күнделікті қызметте мемлекеттік тілді кеңінен қолдануға мүмкіндік береді.

Тестілеуге Бас қолбасшылықтың елуге жуық офицері мен келісімшарт бойынша қызмет атқаратын әскери қызметшілері қатысты.

Тілдік білімді бағалау тыңдалым, лексика-грамматика, оқылым сынды үш бағыт бойынша жүргізілді. Тестте барлығы 150 тапсырма бар.  

Айта кетейік, Qaztest – мемлекеттік тілді меңгеру деңгейін анықтауға арналған ұлттық бағалау жүйесі, оның нәтижелері мемлекеттік органдар мен әскери құрылымдарда біліктілікті көтеру және тілдік даярлықты жетілдіру үшін кеңінен қолданылады.

Ұлттық ұланда тіл саясатын сапалы жүзеге асыру кәсіби әскери дайындықпен қатар, мемлекеттік қызметтің маңызды құрамдас бөлігі болып саналады.