27-29 қараша аралығында Абай облысы Абай ауданының Жидебай қорығында «Абай салбұрыны – 2025» республикалық құсбегілер турнирі өтіп жатыр, деп хабарлады Elordainfo.kz.

Іс-шара Қазақстан Бүркіт федерациясының қолдауымен және Абай Құнанбайұлының 180 жылдық мерейтойына орай ұйымдастырылған.

Турнир бағдарламасына бүркіт, ителгі, қаршыға баптау бойынша құсбегілер сайысы, ұлттық спорт түрлерінен облыстық жарыстар, қазақы тазы жүгірту және көрермендерге арналған этнобағдарламалар кіреді.

Биылғы салбұрынға еліміздің 12 облысынан шамамен 70 бүркіт, 14 ителгі, 15 қаршыға және 20-дан астам тазы қатысып отыр.

Іс-шара Жидебай өңіріндегі этноауыл кешенінде өтіп, ұлттық спорт пен дәстүрлі құсбегілік өнерін кеңінен насихаттауды мақсат етеді.