Министр үйлердің түтін мұржаларын тазартуға шақырды

Төтенше жағдайлар министрі Сырым Шәріпханов жеке тұрғын үйлердің иелерін жылыту және электрмен жабдықтау жүйесін алдын ала ретке келтіруге, түтін мұржаларын тазартуға шақырды, деп хабарлады Elorda.info.

Павлодар облысының тұрғындарымен кездесу барысында министр жылыту кезеңінің қорытындысы бойынша өртте қаза болғандар саны 6%-ға азайғанын айтты. 

Барлығы 3,5 мыңнан астам өрт тіркелді.

Өрт шығуының негізгі себептері – пешті жылытуды дұрыс орнатпау және пайдалану,  отты абайсыз пайдалану.

Осы фактілерді ескере отырып, алдағы жылыту кезеңіне дайындық аясында азаматтардан жылыту және электрмен жабдықтау жүйесін алдын ала ретке келтіруді, түтін мұржаларын тазалауды жүргізуді сұраймын, - деді Сырым Шәріпханов.

Сонымен қатар, қыста газ баллондарының жарылып, өрт шыққан фактілер саны өскені тіркелді.

Сырым Шәріпханов лицензияланған станцияларда тек жарамды және қажетті газ жабдығын пайдалану керектігін еске салды. Екі қабаттан асатын көп пәтерлі үйлерде газ баллондарын қолдануға тыйым салынады.