ITEC арқылы 1390 қазақстандық білім алды

Үндістан Елшілігі Үндістанның техникалық және экономикалық ынтымақтастық күнін (ITEC) Астанада атап өтті, деп хабарлады Elorda.info.

Іс-шараға 100-ден астам адам қатысты. Олардың қатарында Ғылым және жоғары білім министрлігінің вице-министрі Дархан Ахмед-Заки сондай-ақ әртүрлі салалардағы ITEC түлектері, Сыртқы істер министрлігінің, жергілікті оқу орындарының және бұқаралық ақпарат құралдарының өкілдері бар. 

Мұнда  Үндістанның бай мәдени дәстүрлерін бейнелейтін  «Мұра- धरोहर « атты арнайы мәдени қойылым көрсетілді. 

ITEC 1964 жылы 15 қыркүйекте іске қосылды. Бұл – 160 серіктес елдермен және 13 көпжақты агенттіктермен әлеуетті арттыру бойынша Үндістанның жетекші ынтымақтастық бағдарламасы. Жыл сайын Үндістанның 1000-ға жуық жетекші оқу орындарында білім береді. Оқу бағдарламасы көптеген пәндерді қамтиды. Бағдарлама шеңберінде Үндістан тек  азаматтық және қорғаныс салаларында әлеуетті арттыруды ғана емес, сонымен қатар техникалық-экономикалық негіздемелер, үндістандық сарапшыларды шетелге жіберу, таныстыру сапарлары, гуманитарлық көмек және табиғи апаттарды жою сияқты жобаларға байланысты іс-шараларды ұсынады.

Қазақстан – 1992 жылдан бастап Үндістанның ITEC серіктесі. Содан бері Қазақстаннан 1390-ға жуық маман, оның ішінде 1070 азаматтық қатысушы және 320-ға жуық әскери қызметші ITEC шеңберінде ұсынылатын әлеуетті арттыру бойынша қысқа мерзімді мамандандырылған оқу бағдарламаларын пайдаланды. Қазақстан азаматтарын ITEC бағдарламасына көбірек қатысуға ынталандыру үшін Үндістан үкіметі жақында оқу орындарының санын 75-тен 100-ге дейін арттырды.

ITEC өзін Үндістан мен Қазақстан арасындағы достық байланыстарын нығайту құралы ретінде көрсетті.